ગાંધીનગર : ગુજરાત પોલીસના અનોખા પ્રોજેક્ટ ‘તેરા તુજકો અર્પણ’ અંતર્ગત આજે ગૃહ રાજ્ય મંત્રી હર્ષ સંઘવીએ તેમના કાર્યાલય ખાતેથી સાયબર ફ્રોડનો ભોગ બનેલા નિર્દોષ નાગરિકોની પરસેવાની કમાણીના રૂ. 2.07 કરોડથી વધુની રકમ તેમના મૂળ માલિકોને પરત કરી છે. ગુજરાત સ્ટેટ સાયબર ક્રાઈમ સેલે આ નાણાં રિફંડ તરીકે મેળવ્યા હતા, જે નાગરિકોએ ઇન્વેસ્ટમેન્ટ ફ્રોડ, ફેક એપ્લિકેશન, બોગસ લિંક, ક્રેડિટ કાર્ડ કસ્ટમર કેર ફ્રોડ અને ઓટીપી ફ્રોડ જેવી વિવિધ સાયબર ઠગાઈઓમાં ગુમાવ્યા હતા. આજે આ પ્રોજેક્ટ હેઠળ 9 વ્યક્તિઓને તેમના નાણાં પરત કરવામાં આવ્યા છે.

ગુજરાત પોલીસની નાગરિકલક્ષી પહેલ:
રાજ્યના નાગરિકોની સુરક્ષા અને સુવિધાને પ્રાથમિકતા આપીને ગુજરાત પોલીસે શરૂ કરેલી ‘તેરા તુજકો અર્પણ’ પહેલ રાજ્યભરમાં સકારાત્મક પરિણામો લાવી રહી છે. મુખ્યમંત્રી ભૂપેન્દ્રભાઈ પટેલના નેતૃત્વમાં અને ગૃહ રાજ્ય મંત્રી હર્ષ સંઘવીના માર્ગદર્શન હેઠળ આ પહેલ અંતર્ગત ચોરી, લૂંટ કે છેતરપિંડી જેવા ગુનાઓમાં ગુમાવેલો મુદ્દામાલ તેના મૂળ માલિકોને પરત કરવાનું કામ થઈ રહ્યું છે.

‘તેરા તુજકો અર્પણ’નો ઉદ્દેશ:
આ પ્રોજેક્ટનો મુખ્ય હેતુ પોલીસ સ્ટેશનમાં ચોરી, લૂંટ સહિતના ગુનાઓમાં રિકવર કરાયેલો કે કબજે કરાયેલો મુદ્દામાલ કોર્ટના માર્ગદર્શન હેઠળ ઝડપથી મૂળ માલિકો સુધી પહોંચાડવાનો છે. આ પહેલનો ઉદ્દેશ એવો છે કે ફરિયાદીઓ અને અરજદારોને પોલીસ સ્ટેશનના ધક્કા ન ખાવા પડે અને તેમના સમય તથા શક્તિનો વ્યય ન થાય. આ માટે જાહેર કાર્યક્રમો અને લોક દરબારનું આયોજન કરીને મુદ્દામાલ પરત કરવામાં આવે છે. ‘તેરા તુજકો અર્પણ’ એ નાગરિકોને તેમની ચોરાયેલી, ખોવાયેલી કે રિકવર કરાયેલી ચીજવસ્તુઓ ઓછામાં ઓછા સમયમાં પરત મળે તેવા પ્રયાસોનું પરિણામ છે.

લોકસેવાનું જીવંત ઉદાહરણ:
‘તેરા તુજકો અર્પણ’ ગુજરાત પોલીસની લોકસેવા અને નાગરિકો પ્રત્યેની પ્રતિબદ્ધતાનું એક જીવંત ઉદાહરણ બની રહ્યું છે. આ પહેલ રાજ્યના નાગરિકોમાં વિશ્વાસ અને સુરક્ષાની ભાવનાને મજબૂત કરી રહી છે. આ કાર્યક્રમમાં સીઆઈડી ક્રાઈમના આઈ.જી.પી. પરીક્ષિતા રાઠોડ, સ્ટેટ સાયબર ક્રાઈમ સેલના એસ.પી. ધર્મેન્દ્ર શર્મા અને ભરતસંગ ટાંક ઉપસ્થિત રહ્યા હતા. આ પ્રોજેક્ટ દ્વારા ગુજરાત પોલીસે સાયબર ગુનાઓ સામે લડવાની સાથે નાગરિકોના નાણાં પરત કરવાનું ઉમદા કાર્ય કરીને લોકોનો ભરોસો જીત્યો છે.