ગાંધીનગર, : યુનાઈટેડ નેશન્સ જનરલ એસેમ્બલીએ વર્ષ ૨૦૨૫ને "આંતરરાષ્ટ્રીય સહકાર વર્ષ" તરીકે જાહેર કર્યું છે. આ સંયુક્ત રાષ્ટ્ર સમર્થિત પહેલનો ઉદ્દેશ આર્થિક વિકાસ, સામાજિક સમાવેશ અને પર્યાવરણીય સ્થિરતામાં સહકારી સંસ્થાઓના યોગદાન અંગે જાગૃતિ લાવવાનો છે. આ અંતર્ગત કેન્દ્ર સરકાર અને ગુજરાત સરકારે પણ સહભાગી બનીને વિવિધ કાર્યક્રમોનું આયોજન કરવાની તૈયારીઓ શરૂ કરી દીધી છે.

સંયુક્ત રાષ્ટ્રોએ "૨૦૩૦ એજન્ડા ફોર સસ્ટેનેબલ ડેવલપમેન્ટ" હાંસલ કરવામાં સહકારી સંસ્થાઓની મહત્ત્વની ભૂમિકાને સ્વીકારી છે. આંતરરાષ્ટ્રીય સહકાર વર્ષ-૨૦૨૫નો હેતુ સામૂહિક જવાબદારી, લોકશાહી નિર્ણય પ્રક્રિયા અને સમુદાયિક સશક્તિકરણને પ્રોત્સાહન આપવાની સાથે ગરીબી, અસમાનતા અને જળવાયુ પરિવર્તન જેવા વૈશ્વિક પડકારોને સંબોધવા સહકારી મોડલ પર ધ્યાન કેન્દ્રિત કરવાનો છે. આ માટે તમામ સભ્ય દેશો, સંયુક્ત રાષ્ટ્ર અને સંબંધિત હિતધારકોને સક્રિય ભાગીદારી માટે પ્રોત્સાહિત કરવામાં આવ્યા છે.

કેન્દ્ર સરકારે આંતરરાષ્ટ્રીય સહકાર વર્ષ-૨૦૨૫ની ઉજવણી ગ્રામીણ, તાલુકા, જિલ્લા અને રાજ્ય કક્ષાએ થાય તે માટે વિવિધ કમિટીઓની રચના કરી છે અને કાર્યક્રમોનું આયોજન કરવાનું શરૂ કર્યું છે. ગુજરાત સરકાર પણ આ પહેલમાં ઉત્સાહભેર જોડાઈ છે. ગુજરાત રાજ્ય સહકારી કાઉન્સિલની તાજેતરની બેઠકમાં આ વર્ષની ઉજવણી અંગે ચર્ચા થઈ હતી, અને જુદા-જુદા કાર્યક્રમો માટે રાજ્ય સરકાર પાસે પ્રાયોજિત ભંડોળ ઉપલબ્ધ છે, ઉપરાંત અલગથી ફંડ પણ ફાળવવામાં આવ્યું છે.

રાજ્ય સરકારે સહકારી સંસ્થાઓને આ પહેલમાં સહભાગી બનવા માટે પ્રોત્સાહન આપ્યું છે. ગુજરાત સહકારી મંડળી અધિનિયમ હેઠળ સહકારી સંસ્થાઓને તેમના અનામત ફંડના 20 ટકા સુધીના નાણાં આ કાર્યક્રમો માટે જમા કરવાની મંજૂરી આપવામાં આવી છે. આ નિર્ણયનો હેતુ એ સુનિશ્ચિત કરવાનો છે કે સહકારી સંસ્થાઓએ સરકારની પૂર્વ મંજૂરી મેળવવામાં સમય ન બગાડવો પડે અને ઉજવણીની પ્રવૃત્તિઓમાં કોઈ અવરોધ ન આવે. રજિસ્ટ્રારશ્રી, સહકારી મંડળીઓ, ગાંધીનગરની યાદીમાં જણાવાયું છે કે આ ફંડ ફરજિયાત નથી, પરંતુ સંસ્થાઓ પોતાની ઈચ્છાથી યોગદાન આપી શકે છે.

આંતરરાષ્ટ્રીય સહકાર વર્ષ-૨૦૨૫ના વિઝનને જમીની સ્તરે લાગુ કરવામાં સહકારી સંસ્થાઓ મહત્ત્વની ભૂમિકા ભજવવા ઈચ્છે છે. આ પહેલ દ્વારા લોકભાગીદારીથી વિવિધ કાર્યક્રમો યોજાઈ શકે તેવી અપેક્ષા છે. સહકારી સંસ્થાઓ સસ્ટેનેબલ ડેવલપમેન્ટ ગોલ્સ (SDGs) હાંસલ કરવામાં અને સામાજિક-આર્થિક વિકાસને વેગ આપવામાં મદદરૂપ થઈ શકે છે. આ માટે ગુજરાત સરકારે સહકારી સંસ્થાઓને સરળતા આપવા નીતિવિષયક પગલાં લીધાં છે, જેથી તેઓ આ વૈશ્વિક પહેલનો ભાગ બની શકે.

ગુજરાતમાં સહકારી ચળવળનો મજબૂત ઈતિહાસ રહ્યો છે, અને આંતરરાષ્ટ્રીય સહકાર વર્ષ-૨૦૨૫ની ઉજવણી રાજ્યના સહકારી સંગઠનો માટે તેમની ભૂમિકાને વૈશ્વિક સ્તરે રજૂ કરવાની તક બનશે. રાજ્ય સરકારે આ ઉજવણીને ગામડે-ગામડે પહોંચાડવાનું આયોજન કર્યું છે, જેમાં સ્થાનિક સહકારી સંસ્થાઓની સક્રિય ભાગીદારીની અપેક્ષા છે.

આ પહેલ દ્વારા ગુજરાત સહકારી સંસ્થાઓની શક્તિને ઉજાગર કરવાની સાથે વૈશ્વિક પડકારોનો સામનો કરવા માટે સહકારના મૂલ્યોને પ્રોત્સાહન આપવાનો પ્રયાસ કરશે. આંતરરાષ્ટ્રીય સહકાર વર્ષ-૨૦૨૫ની સફળતા માટે કેન્દ્ર અને રાજ્ય સરકારની સંકલિત કામગીરી આગામી સમયમાં નિર્ણાયક સાબિત થશે.