અમદાવાદ,તા.૧૦: અખિલ ભારતીય કોંગ્રેસ અધ્‍યક્ષ મલ્લિકાર્જુન ખડગેએ બુધવારે સાબરમતી તટ ખાતે યોજાયેલા રાષ્‍ટ્રીય મહાઅધિવેશનના સમાપન પ્રસંગે પુનરોચ્‍ચાર કર્યો હતો કે, ‘ગુજરાતમાં કોંગ્રેસ હવે પછી યોજાનારી વિધાનસભા ચૂંટણીમાં જરૂરથી સત્તા મેળવશે. પ્રદેશ કોંગ્રેસ પ્રમુખ શક્‍તિસિંહ ગોહિલ હવે તમારી શક્‍તિ બતાવો. કોંગ્રેસ નેતા રાહુલ ગાંધી, સોનિયા ગાંધી, રાષ્‍ટ્રીય અધ્‍યક્ષ સહિત સમગ્ર કોંગ્રેસ તમારી સાથે છે. હવે તમારે કાર્યકરોને સાથે લઇને લોકોને જોડવાના છે.'

રાષ્‍ટ્રીય કાર્યકારિણીના મંથન બાદ બીજા દિવસે યોજાયેલા રાષ્‍ટ્રીય મહાઅધિવેશનમાં પોતાના અધ્‍યક્ષીય સંબોધનમાં ખડગેએ સ્‍પષ્ટ કર્યું હતું કે, ‘કોંગ્રેસ હવે નવી રણનીતિ સાથે આગળ વધવાની છે અને એની શરૂઆત ગુજરાતથી કરશે. ગુજરાતના કાર્યકરોએ સંકલ્‍પબદ્ધ થઇને પોતાના ઘરમાંથી બહાર નીકળે. કોંગ્રેસના કાર્યકરોએ એક થઇને કોઇ લોભલાલચ કે ધમકીને વશ થયા વગર વિચારધારાની લડાઇ લડવાની છે. એક વખત દેશને આઝાદ કરવા માટે લડાઇ લડાઇ હતી, એ વખતે બહારની તાકાત લડાઇનો લાભલેતી હતી.

હવે દેશની જ સરકાર દ્વારા વકરાવાતા કોમવાદ, ગરીબી, ભેદભાવ, અન્‍યાય સામે એક જૂથ થઇને લડાઇ લડવાની છે. તેમણે ઉમેર્યું કે, ડરીશું નહીં, ઝૂકીશું નહી.તેમણે કહ્યું કે, અગાઉ દિલ્‍હીમાં જિલ્લા અધ્‍યક્ષો સાથે એક બેઠક યોજાઇ ચૂકી છે હવે કોંગ્રેસ નેતળત્‍વએ નક્કી કર્યું છે કે, જનપ્રતિનિધિઓ માટેના ઉમેદવારોની પસંદગી પ્રક્રિયામાં જિલ્લા અધ્‍યક્ષોના મતને મહત્‍વ અપાશે. કોંગ્રેસ નવી રણનીતિથી સંગઠનની રચના કરવાની છે ત્‍યારે મને વિશ્વાસ છે કે કોંગ્રેસ સૌને સાથે લઇને કેન્‍દ્રની મોદી સરકાર, આરએસએસની વિચારધારા સામેની લડાઇ પર વિજય મેળવશે.આ સાથે ખડગેએ કેટલીક બાબતો ભારપૂર્વક સ્‍પષ્ટ કરી હતી કે, કોંગ્રેસમાં ઘણાં લોકો પદ અને હોદ્દા મેળવતા હોય છે. આવા લોકો કંઇપણ કામ કરતા નથી આવા લોકોને મારે કહેવું છે કે હવે તમે આરામ કરો.(૪૦.૨)