ગાંધીનગર : ગુજરાતમાં રવિવારે મોડી રાતથી શરૂ થયેલો કમોસમી વરસાદ સતત બીજા દિવસે પણ ચાલુ રહ્યો, જેના કારણે રાજ્યના 77 તાલુકાઓમાં વરસાદ નોંધાયો. હવામાન વિભાગે એકસાથે ત્રણ સિસ્ટમ સક્રિય થવાને કારણે 8 મે સુધી કમોસમી વરસાદની આગાહી કરી છે. આ વરસાદથી વાતાવરણમાં ઠંડક પ્રસરી છે, પરંતુ ખેડૂતો ઉભા પાકને નુકસાનની ચિંતામાં મુકાયા છે.

સ્ટેટ ઈમરજન્સી ડેટા સેન્ટરના આંકડા મુજબ, આજે સવારે 6થી સાંજે 6 દરમિયાન ભાવનગર જિલ્લાના મહુવામાં સૌથી વધુ 93 મિ.મી. (3.6 ઈંચ) વરસાદ નોંધાયો. અમરેલી જિલ્લાના લાઠીમાં 61 મિ.મી. (2.4 ઈંચ), લીલીયામાં 49 મિ.મી. (1.9 ઈંચ), સાવરકુંડલામાં 38 મિ.મી. (1.5 ઈંચ), અમરેલીમાં 47 મિ.મી. (1.85 ઈંચ), બાબરામાં 36 મિ.મી. (1.42 ઈંચ) અને રાજકોટના ગોંડલમાં 33 મિ.મી. (1.30 ઈંચ) વરસાદ ખાબક્યો. આ ઉપરાંત, કચ્છના નખત્રાણામાં 22 મિ.મી., ડાંગના વઘઈ અને ભાવનગરના જેસરમાં 21-21 મિ.મી., રાજકોટના જસદણ અને વીંછિયામાં 20-20 મિ.મી. વરસાદ નોંધાયો. રાજ્યના 7 તાલુકામાં 1 ઈંચથી વધુ અને 2 તાલુકામાં 2 ઈંચથી વધુ વરસાદ વરસ્યો છે.

ભાવનગર જિલ્લાના ગારિયાધાર, પાલીતાણા અને તળાજા પંથકમાં બપોરે અચાનક વાતાવરણ બદલાયું, અને તોફાની પવન સાથે ધોધમાર વરસાદ વરસ્યો. તળાજાના સોસિયા, મણાર, ત્રાપજ સહિતના ગ્રામ્ય વિસ્તારોમાં કરાં સાથે વરસાદ પડ્યો, જેના કારણે રસ્તાઓ પર પાણી ફરી વળ્યાં. સૌરાષ્ટ્રના અમરેલી જિલ્લામાં પણ વ્યાપક વરસાદ થયો, જેના કારણે વાતાવરણ ઠંડુગાર બન્યું. જોકે, આ કમોસમી વરસાદથી ખેડૂતો ચિંતામાં મુકાયા છે, કારણ કે તૈયાર પાકને નુકસાન થવાની ભીતિ છે. ખેડૂતોએ જણાવ્યું કે, આવા વરસાદથી આર્થિક નુકસાન થઈ શકે છે, અને તેઓએ સરકાર પાસે સહાયની માગણી કરી છે.