ગાંધીનગર: પર્યાવરણ સંરક્ષણ પ્રત્યે જાગૃતિ લાવવા માટે વિશ્વભરમાં દર વર્ષે 5 જૂનના રોજ *"વિશ્વ પર્યાવરણ દિવસ"*ની ઉજવણી કરવામાં આવે છે. આ વર્ષની ઉજવણીના ભાગરૂપે ગીર ફાઉન્ડેશન-ગાંધીનગર દ્વારા આગામી 5 જૂન સુધી "વૈશ્વિક સ્તરે પ્લાસ્ટિક પ્રદૂષણનો અંત" વિષય પર એક ભવ્ય લોકજાગૃતિ અભિયાનનું આયોજન કરવામાં આવ્યું છે. આ અભિયાનનો પ્રારંભ આજે વન અને પર્યાવરણ મંત્રી મૂળુભાઈ બેરાએ કરાવ્યો, જેમાં પર્યાવરણીય પડકારો અને પ્લાસ્ટિક પ્રદૂષણ અંગે જનજાગૃતિ કેળવવા વિવિધ કાર્યક્રમો યોજાશે.
આ અભિયાનના ભાગરૂપે, આજે 22 મે ના રોજ વન અને પર્યાવરણ મંત્રી મૂળુભાઈ બેરાએ ગીર ફાઉન્ડેશન ઇન્દ્રોડા પ્રકૃતિ ઉદ્યાન-ગાંધીનગર ખાતેથી *"પ્લાસ્ટિક એકત્રીકરણ ઝુંબેશ"નો શુભારંભ કરાવ્યો હતો. ગીર ફાઉન્ડેશન-ગાંધીનગર અને ગુજરાત પોલ્યુશન કંટ્રોલ બોર્ડ-ગાંધીનગરના સંયુક્ત ઉપક્રમે આ ઝુંબેશ દરમિયાન મંત્રીશ્રીએ ઇન્દ્રોડા પ્રકૃતિ ઉદ્યાન ખાતે ઉભા કરાયેલા *"પ્લાસ્ટિક એકત્રીકરણ કેન્દ્ર"**નું પણ ઉદ્ઘાટન કર્યું હતું. આ કેન્દ્ર ખાતે પ્લાસ્ટિક કચરો જમા કરાવનાર બાળકોને પ્રોત્સાહનરૂપે મંત્રી મૂળુભાઈ બેરાના હસ્તે રિસાયકલ કરેલા પ્લાસ્ટિકમાંથી બનેલી ઉપયોગી ચીજવસ્તુઓ આપવામાં આવી હતી.
જનજાગૃતિ બાઈક રેલી અને 'મિશન લાઈફ'ની પ્રતિજ્ઞા
આ ઉપરાંત, મંત્રી મૂળુભાઈ બેરાએ ઇન્દ્રોડા પ્રકૃતિ ઉદ્યાન ખાતેથી જનજાગૃતિ બાઈક રેલીને લીલી ઝંડી આપીને પ્રસ્થાન કરાવ્યું હતું. આ રેલીમાં વન વિભાગ, ગીર ફાઉન્ડેશન, GPCB અને અન્ય સહયોગી સંસ્થાઓના અધિકારીઓ-કર્મચારીઓ તેમજ શાળાના બાળકોએ મોટી સંખ્યામાં જોડાઈને પર્યાવરણ સંરક્ષણનો સંદેશો સામાન્ય જનતા સુધી પહોંચાડ્યો હતો. આ પ્રસંગે ઉપસ્થિત મંત્રી સહિત સૌ મહાનુભાવો અને નાગરિકોએ *'મિશન લાઇફ'*માં જોડાઈને રોજિંદા જીવનમાં પર્યાવરણ-અનુકૂળ ફેરફારો લાવવાની પ્રતિજ્ઞા પણ લીધી હતી.
પ્લાસ્ટિક એકત્રીકરણ અભિયાન: કચરો આપો, ઉપયોગી વસ્તુઓ મેળવો
મંત્રી મૂળુભાઈ બેરાએ સંબોધન કરતા જણાવ્યું હતું કે, પ્લાસ્ટિક એકત્રીકરણ અભિયાન મારફત નાગરિકોને પ્લાસ્ટિક કચરાના યોગ્ય નિકાલ માટે પ્રોત્સાહિત કરવામાં આવશે. આ અભિયાન હેઠળ આગામી 5 જૂન સુધી કોઈપણ વ્યક્તિ પોતાના ઘર કે ઓફિસમાંથી બિનઉપયોગી પ્લાસ્ટિકની વસ્તુઓ ઇન્દ્રોડા પ્રકૃતિ ઉદ્યાન ખાતે ઉભા કરાયેલા પ્લાસ્ટિક એકત્રીકરણ કેન્દ્ર ખાતે જમા કરાવી શકશે. જેના વળતર સ્વરૂપે નાગરિકોને રિસાયકલ કરેલા પ્લાસ્ટિકમાંથી બનેલી વિવિધ ઉપયોગી વસ્તુઓ આપવામાં આવશે.
મંત્રી મૂળુભાઈ બેરાએ વિશ્વાસ વ્યક્ત કર્યો કે, પર્યાવરણની ચિંતા એ માત્ર કોઈ એક વ્યક્તિની નહીં, પરંતુ આપણા સૌની સહિયારી જવાબદારી છે. રાજ્યના સૌ નાગરિકો પર્યાવરણ સંરક્ષણના આ અભિયાનમાં જોડાઈને પ્લાસ્ટિકનો વપરાશ ઘટાડશે તેમજ પ્લાસ્ટિક કચરાનું યોગ્ય વ્યવસ્થાપન કરવા માટે જાગૃત અને કટિબદ્ધ બનશે.
આ શુભારંભ પ્રસંગે વન અને પર્યાવરણ વિભાગના અગ્ર સચિવ સંજીવ કુમાર ભાઈ, ગુજરાતના અગ્ર મુખ્ય વન સંરક્ષક ડોક્ટર જયપાલસિંહ ભાઈ, ગુજરાત પોલ્યુશન કંટ્રોલ બોર્ડ, વન અને પર્યાવરણ વિભાગ તેમજ અન્ય સહયોગી સંસ્થાના વરિષ્ઠ અધિકારીઓ સહિત નાગરિકો પણ ઉપસ્થિત રહ્યા હતા. આ અભિયાન ગુજરાતને પ્લાસ્ટિક મુક્ત બનાવવાની દિશામાં એક મહત્વપૂર્ણ કદમ સાબિત થશે.