તલોદ, ૨૮ મે, ૨૦૨૫: સાબરકાંઠા જિલ્લાના તલોદ તાલુકામાં કાયદો અને વ્યવસ્થાની સ્થિતિને પડકારતી એક ગંભીર ઘટના સામે આવી છે. તલોદના હરસોલ બજાર વિસ્તારમાં બે જૂથો વચ્ચે જૂથ અથડામણ ચાલી રહી હતી, જેને શાંત પાડવા માટે પહોંચેલી પોલીસ ટીમ પર જ ઉશ્કેરાયેલા ટોળાએ હુમલો કર્યો હતો. પોલીસને માર મારતો આ વીડિયો સોશિયલ મીડિયા પર વાયરલ થતા ચકચાર મચી ગઈ છે.
પોલીસ પર હુમલો અને ઈજાગ્રસ્તોની વિગત
પ્રાથમિક માહિતી અનુસાર, તલોદના હરસોલ બજારમાં બે જૂથો વચ્ચે કોઈ બાબતે માથાકૂટ ચાલી રહી હતી. આ મામલો ઉગ્ર બનતા પોલીસને જાણ કરાઈ હતી અને પોલીસ ટીમ ઘટનાસ્થળે પહોંચી હતી. પરંતુ, મામલો શાંત થવાની બદલે, ઉશ્કેરાયેલા લોકોના ટોળાએ પોલીસ પર જ હુમલો કરી દીધો હતો. લોકોએ લાકડીઓ લઈને પોલીસને માર મારવાનું શરૂ કર્યું હતું. પોલીસને ઢીબી નાખતો આ વીડિયો સોશિયલ મીડિયામાં ઝડપથી વાયરલ થયો છે.
આ અથડામણ અને પોલીસ પરના હુમલામાં કુલ ૬ લોકો ઈજાગ્રસ્ત થયા હતા. તમામને તાત્કાલિક સારવાર માટે હોસ્પિટલ ખસેડવામાં આવ્યા હતા, જેમાં બે લોકો વધુ ઈજાગ્રસ્ત થતા તેમને વધુ સારવાર માટે હિંમતનગરની સિવિલ હોસ્પિટલ ખસેડવામાં આવ્યા છે.
પોલીસ કાર્યવાહી અને તપાસનો ધમધમાટ
ઘટનાની જાણ થતા જ ઉચ્ચ પોલીસ અધિકારીઓનો કાફલો તાત્કાલિક ઘટના સ્થળે પહોંચી ગયો હતો અને પરિસ્થિતિને કાબૂમાં લીધી હતી. પોલીસે આ સમગ્ર મામલે ગુનો નોંધીને વધુ તપાસ હાથધરી છે. પોલીસ પર હુમલો કરનારા લોકોની અટકાયત કરવામાં આવી છે અને તેમની સામે કાયદેસરની કાર્યવાહી હાથ ધરવામાં આવી રહી છે. પુરાવા એકત્રિત કરવા માટે પોલીસે આસપાસના સીસીટીવી ફૂટેજ પણ તપાસ માટે કબજે લીધા છે.
તલોદમાં ગઈકાલે પણ ખાનગી અદાવતમાં બબાલ
ઉલ્લેખનીય છે કે, તલોદમાં ગઈકાલે (૨૭ મે) પણ અંગત અદાવતને લઈને મગજમારી થઈ હોવાની ઘટના સામે આવી હતી. તલોદના વસ્તાજીના મુવાડાના એક શખ્સની જેઠાજીના મુવાડાના શખ્સો સાથે વરઘોડામાં થયેલા ઝઘડા મામલે તકરાર થઈ હતી. આ અંગે તલોદ પોલીસ સ્ટેશનમાં અરજી આપવા ગયેલા વસ્તાજીના મુવાડાના શખ્સના પાર્લરને જેઠાજીના મુવાડાના સ્ટેન્ડની સામે દાદરડાની સીમમાં સળગાવી દેવામાં આવ્યું હતું, જે અંગે પણ ફરિયાદ નોંધાઈ હતી.
આ ઉપરાછાપરી ઘટનાઓ તલોદ વિસ્તારમાં કાયદો અને વ્યવસ્થાની સ્થિતિ અંગે ચિંતા જગાવી રહી છે, અને પોલીસ તંત્ર દ્વારા સઘન પેટ્રોલિંગ અને કાર્યવાહી હાથ ધરવામાં આવી છે.