અમદાવાદ તા.૩૧: રાજ્‍ય સરકારની કચેરીઓમાં કેન્‍દ્ર સરકારની કચેરીઓની જેમ કામકાજના પાંચ દિવસો રાખવા માટે રાજ્‍ય કર્મચારી મહામંડળે માગણી કરી છે. એકતરફ સરકારે નિમેલા વહીવટી સુધારણા પંચે સરકાર કાર્યક્ષમતા વધારવા સરકારી કચેરીઓનો સમય સવારે ૯.૩૦થી ૫.૧૦ વાગ્‍યા સુધીનો કરવાની ભલામણ કરી છે ત્‍યારે કર્મચારી મહામંડળે સપ્તાહમાં બે દિવસ રજાની માગણી કરી છે.

રાજ્‍ય કર્મચારી મહામંડળ દ્વારા મુખ્‍ય સચિવ પંકજ જોશી, સામાન્‍ય વહીવટ વિભાગના અધિક મુખ્‍ય સચિવ કમલ દયાની અને ગુજરાત વહીવટી સુધારણા પંચના વડા ડો. હસમુખ અઢિયાને વિગેરેને લેખિત રજૂઆત કરી છે. જેમાં જણાવાયું છે કે તાજેતરમાં વહીવટી સુધારણા પંચ દ્વારા સરકારી કચેરીના કામકાજના સમયમાં ફેરફાર કરવા જણાવાયું છે. કર્મચારીઓની કાર્યક્ષમતા વધારવા ભારત સરકાર દ્વારા સરકારી કચેરીઓને સપ્તાહમાં પાંચ દિવસ કાર્યરત કરાઇ છે. ભારત સરકાર અને અન્‍ય રાજ્‍ય રાજસ્‍થાન, મહારાષ્‍ટ્ર, પંજાબ, બિહાર વિગેરેમાં પણ સપ્તાહમાં પાંચ દિવસ કામકાજ કરાય છે. તેવી રીતે ગુજરાતના વહીવટી તંત્ર માટે ફાઇવ ડે વીકનો અમલ કરાય તો  સરકાર અને કર્મચારીના પણ કામગીરીને લગતા અનેક વીજળી, પાણી, પરિવહન જેવા ખર્ચની બચત થઇ શકે છે. તે સાથે સરકારી અધિકારી-કર્મચારીઓ પરિવાર સાથે સમય પણ પસાર કરી શકશે. એટલું જ નહીં વર્ક લાઇફ બેલેન્‍સ સાથે સામાજિક કામમાં પણ ભાગ લઇ શકશે.

કર્મચારી મહામંડળના અગ્રણી સતિષ પટેલ અને ભરત ચૌધરીએ રજૂઆતમાં વધુમાં જણાવ્‍યું છે કે જો પાંચ દિવસ સપ્તાહનો સમય કરાય તો સવારે ૯.૪૫થી સાંજે ૬.૧૦ સુધીના કરાય તો રિસેસનો સમય બાદ કરતા કર્મચારીઓ બે સપ્તાહમાં ૨૦ મિનિટ વધુ કામગીરી કરશે. ૩૩ ટકા જેટલી મહિલા કર્મચારીઓને પણ વધુ અનુકૂળતા રહેશે.  બે દિવસ રજા મળવાના કારણે પ્રવાસન ઉદ્યોગ અને અન્‍ય વ્‍યવસાયમાં પણ અર્થ વ્‍યવસ્‍થાને ફાયદો થશે. કર્મચારીઓની કાર્યક્ષમતામાં વધારો થવાથી સરકારની કાર્ય ઉત્‍પાદકતામાં પણ વધારો થશે.(૩૮.૧૨)