ગાંધીનગર, તા. ૩ જૂન, ૨૦૨૫: ગુજરાતના સરકારી બાબુઓમાં ખળભળાટ મચાવતો એક સનસનાટીપૂર્ણ નિર્ણય સામે આવ્યો છે! રાજ્યના વન અને પર્યાવરણ વિભાગે બે પરિક્ષેત્ર વન અધિકારી (રેન્જ ફોરેસ્ટ ઓફિસર), વર્ગ-૨ ને અચાનક સરકારી સેવામાંથી છૂટા કરી દેવાનો આદેશ કર્યો છે. આ અધિકારીઓ આકાશ જિતેન્દ્રભાઈ પડશાલા (વલસાડ) અને વિજય શંકરલાલ ચાવડા (ગોધરા) છે, જેમની અજમાયશી સેવાઓ 'સંતોષકારક' ન જણાતા આ કડક પગલું ભરવામાં આવ્યું છે. આ ઘટનાએ સરકારી વર્તુળોમાં 'કામ નહીં કરો તો નોકરી નહીં' નો કડક સંદેશ આપ્યો છે!
વલસાડના 'આકાશ' પર તવાઈ:
વલસાડ (ઉત્તર) વન વિભાગની ચીખલી રેન્જમાં ફરજ બજાવતા આકાશ જિતેન્દ્રભાઈ પડશાલાની વાર્ષિક ગુપ્ત રિપોર્ટ્સ (ACR) માં 'પ્રતિકૂળ નોંધ' સામે આવતા તેમની નોકરી પર તવાઈ આવી છે. ૨૦૧૬માં GPSC મારફત પરિક્ષેત્ર વન અધિકારી તરીકે નિમણૂક પામેલા પડશાલાના ૨૦૧૮-૧૯ અને ૨૦૨૧-૨૨ ના વાર્ષિક મૂલ્યાંકન અહેવાલોમાં 'વિરુદ્ધ નોંધ' હતી. એટલું જ નહીં, તેમની સામે કેટલીક 'ગુપ્ત' તપાસ પણ ચાલતી હતી. આ તમામ વિગતોને ધ્યાનમાં લઈને, રાજ્યપાલના આદેશથી તેમની અજમાયશી સેવાઓ તાત્કાલિક અસરથી સમાપ્ત કરી દેવામાં આવી છે.
ગોધરાના 'વિજય' પણ છૂટા:
આકાશ પડશાલાની જેમ જ, ગોધરા રેન્જમાં રીસર્ચ કમ ડેમોમાં ફરજ બજાવતા વિજય શંકરલાલ ચાવડાને પણ સરકારી સેવામાંથી છૂટા કરવામાં આવ્યા છે. ૨૦૧૬માં નિમણૂક પામેલા ચાવડાના ૨૦૧૯-૨૦ ના વાર્ષિક મૂલ્યાંકન અહેવાલમાં પણ 'પ્રતિકૂળ નોંધ' હતી. તેમની સામે ચાલતી તપાસના અહેવાલો અને ACR ની વિગતોને આધારે, સામાન્ય વહીવટ વિભાગના નિયમો મુજબ, રાજ્યપાલના હુકમથી તેમની અજમાયશી સેવાઓ પણ તાત્કાલિક અસરથી સમાપ્ત કરી દેવામાં આવી છે.
આ નિર્ણયો એ વાતનો સ્પષ્ટ સંકેત આપે છે કે હવે સરકારી વિભાગોમાં 'કામચોરી' કે 'બેદરકારી' ચલાવી લેવામાં નહીં આવે. ખાસ કરીને અજમાયશી સમયગાળા દરમિયાન અધિકારીઓએ સંતોષકારક કામગીરી કરવી ફરજિયાત છે, અન્યથા આવા કડક પગલાં ભરીને તેમને સેવામાંથી છૂટા કરી શકાય છે. આ ઘટના સરકારી કર્મચારીઓ માટે એક લાલબત્તી સમાન છે.