ગાંધીનગર, ૬ જૂન: ગુજરાત સરકારના આરોગ્ય અને પરિવાર કલ્યાણ વિભાગ દ્વારા રાજ્યના કર્મયોગીઓ અને તેમના પરિવારોની સ્વાસ્થ્ય સુરક્ષા માટે મહત્વપૂર્ણ નિર્ણય લેવામાં આવ્યો છે. તાજેતરમાં બહાર પાડવામાં આવેલા ઠરાવ અને પરિપત્ર અનુસાર, ગુજરાત કર્મયોગી સ્વાસ્થ્ય સુરક્ષા યોજના (કેશલેસ હેલ્થ બેનિફિટ પેકેજ) નો લાભ મેળવવા માટે PMJAY (પ્રધાનમંત્રી જન આરોગ્ય યોજના) કાર્ડ હોવું અનિવાર્ય છે. આ કાર્ડ મેળવવા માટેની કાર્યવાહી અને પેન્શનરો તેમજ અધિકારીઓના આશ્રિતો માટે જરૂરી પ્રમાણપત્ર અંગેની વિગતવાર સૂચનાઓ જારી કરવામાં આવી છે.
PMJAY કાર્ડ અને SHAની ભૂમિકા:
યોજનાનો લાભ લેવા માટે PMJAY કાર્ડ આવશ્યક રહેશે, અને આ કાર્ડ ફાળવવાની કામગીરી સ્ટેટ હેલ્થ એજન્સી (SHA) ને સોંપવામાં આવી છે. આ વ્યવસ્થા દ્વારા રાજ્ય સરકારના કર્મચારીઓ, અધિકારીઓ અને પેન્શનરો સહિત ઓલ ઇન્ડિયા સર્વિસીસ (AIS) ના અધિકારીઓ પણ કેશલેસ આરોગ્ય સેવાઓનો લાભ લઈ શકશે.
કુટુંબની વ્યાખ્યા અને પ્રમાણપત્રની આવશ્યકતા:
આ યોજના અંતર્ગત લાભાર્થીઓના આશ્રિત કુટુંબીજનો ને પણ આવરી લેવામાં આવશે. રાજ્ય સરકારના અધિકારીઓ, કર્મચારીઓ અને પેન્શનરોના કિસ્સામાં ગુજરાત રાજ્ય સેવા (તબીબી સારવાર) નિયમો, ૨૦૧૫ ના નિયમ ૨.૨ માં દર્શાવેલ કુટુંબની વ્યાખ્યા લાગુ પડશે. જ્યારે, AIS અધિકારીઓના કિસ્સામાં, તેમને લાગુ પડતા ઓલ ઇન્ડિયા સર્વિસીસ (મેડિકલ એટેન્ડન્સ) રૂલ્સ, ૧૯૫૪ માં જણાવેલ કુટુંબની વ્યાખ્યા મુજબની પાત્રતા ધરાવતા આશ્રિતોને લાભ મળશે.
આશ્રિત કુટુંબીજનોની વિગતો દર્શાવતું પ્રમાણપત્ર આપવાનું રહેશે. આ પ્રમાણપત્ર આપવાની જવાબદારી ચોક્કસ કચેરીઓને સોંપવામાં આવી છે.
પેન્શનરો માટે પ્રમાણપત્રની પ્રક્રિયા:
AIS અને રાજ્ય સરકારના પેન્શનર જે જિલ્લા તિજોરી કચેરી, પેટા તિજોરી કચેરી અથવા પેન્શન ચુકવણા કચેરી ખાતેથી પેન્શન મેળવતા હોય, તે જિલ્લાના જિલ્લા તિજોરી અધિકારી / પેટા તિજોરી અધિકારી / પેન્શન ચુકવણા અધિકારી / પગાર અને હિસાબ અધિકારી દ્વારા નિયત નમૂનામાં પ્રમાણપત્ર આપવાનું રહેશે.
વૈકલ્પિક રીતે, જે કચેરીમાંથી પેન્શનર નિવૃત્ત થયા હોય, તે કચેરીના વડા પણ આ પ્રમાણપત્ર આપી શકશે.
તિજોરી કચેરીઓની મુખ્ય ભૂમિકા:
ગુજરાત તબીબી સારવાર નિયમો-૨૦૧૫ ના નિયમ નં-૨.૨ મુજબ કુટુંબની વ્યાખ્યામાં સમાવિષ્ટ કુટુંબના સભ્યો, જેમના નામ પેન્શન અને પ્રોવિડન્ડ ફંડ નિયામકની કચેરી / સહાયક નિરીક્ષક, સ્થાનિક ભંડોળ હિસાબની કચેરી દ્વારા ઇશ્યુ થયેલ જિલ્લા તિજોરી / પેન્શન ચુકવણા કચેરી ખાતે ઉપલબ્ધ પેન્શન ચુકવણી હુકમ (PPO બુક) માં દર્શાવેલ હોય, તે મુજબ ગુજરાત કર્મયોગી સ્વાસ્થ્ય સુરક્ષા યોજના અંતર્ગત પ્રમાણપત્ર આપવાની કામગીરી જિલ્લા તિજોરી / પેન્શન ચુકવણા કચેરી દ્વારા જ કરવાની રહેશે.
આ નવી વ્યવસ્થા રાજ્યના કર્મચારીઓ, અધિકારીઓ અને પેન્શનરોને કેશલેસ આરોગ્ય સેવાઓનો લાભ સરળતાથી મળે તે સુનિશ્ચિત કરશે, જેથી તેમને સારવાર દરમિયાન આર્થિક બોજમાંથી રાહત મળી શકે.