અમદાવાદ, ૦૯ જૂન ૨૦૨૫: અમદાવાદની સિવિલ હોસ્પિટલમાં કોરોનાએ વધુ એક જીવ લીધો છે. સારવાર હેઠળ રહેલી એક ૧૬ વર્ષીય કિશોરીનું કોરોનાને કારણે કરુણ મોત થયાના સમાચાર સામે આવ્યા છે, જેણે આરોગ્ય તંત્ર અને નાગરિકોમાં ચિંતા જગાવી છે. આ કિશોરીને બચાવવા માટે ડોકટરો દ્વારા રેમડેસિવિર અને ટોસીલીઝુમેબ જેવા ઇન્જેક્શનો સહિતના તમામ પ્રયાસો કરવામાં આવ્યા હતા, છતાં તેનો જીવ બચાવી શકાયો નહોતો. આ ઘટના સાથે છેલ્લા કેટલાક દિવસોમાં અમદાવાદમાં કોરોનાને લીધે મૃત્યુ પામનારની મહિલાઓની સંખ્યા ૪ થઈ ગઈ છે, જેમાં અગાઉ ૩ મહિલાઓના મોત થયા હતા.

રાજ્યમાં કોરોનાની સ્થિતિ પર નજર કરીએ તો, છેલ્લા ૨૪ કલાકમાં રાજ્યભરમાં નવા ૧૮૫ કેસ કોરોનાના નોંધાયા છે. આ વધારા સાથે રાજ્યમાં એક્ટિવ કેસની સંખ્યા પણ વધીને ૯૮૦ને પાર થઈ ગઈ છે. હાલની સ્થિતિએ, ૯૮૦ એક્ટિવ કેસ પૈકી ૩૨ દર્દીઓ હોસ્પિટલમાં સારવાર હેઠળ છે, જ્યારે ૯૪૮ દર્દીઓ હોમ આઈસોલેશનમાં છે.

જોકે, આ વચ્ચે એક સારા સમાચાર પણ છે કે આજે ૨૭ જેટલા દર્દીઓને કોરોનામુક્ત જાહેર કરીને ડિસ્ચાર્જ પણ કરવામાં આવ્યા છે. રાજ્યના આરોગ્ય તંત્ર દ્વારા નાગરિકોને, ખાસ કરીને જે દર્દીઓ હાલ હોમ આઈસોલેશનમાં છે, તેઓને પોતાના સ્વાસ્થ્યનું સ્વનિરીક્ષણ કરવાનું ચાલુ રાખવા અપીલ કરવામાં આવી છે. આ સાથે જ, તંત્રએ સ્પષ્ટપણે જણાવ્યું છે કે જો કોઈ દર્દીને ઘરે શ્વાસ લેવામાં તકલીફ કે પછી છાતીમાં દુખાવો થાય, તો તેમણે તાત્કાલિક નજીકના આરોગ્ય કેન્દ્રનો સંપર્ક કરવો હિતાવહ છે. કોરોનાના વધતા કેસ વચ્ચે સાવચેતી અને તાત્કાલિક તબીબી સલાહ લેવી અત્યંત આવશ્યક બની છે.