વલસાડઃ ગઇકાલે મોડી રાત્રે વલસાડ અને ડાંગ જિલ્લામાં વાતાવરણમાં અચાનક આવેલા પલટાએ લોકોને ચોંકાવી દીધા હતા. ભારે પવન, ગાજવીજ અને વીજળીના કડાકા-ભડાકા સાથે વરસાદ તૂટી પડ્‍યો હતો, જેના કારણે કેટલાક વિસ્‍તારોમાં નુકસાન પણ થયું હતું.

ગુરુવારે રાતે ૧૦ વાગ્‍યાથી શુક્રવારે સાંજના ૪ વાગ્‍યા સુધીના વિતેલા ૧૮ કલાકમાં વલસાડ જિલ્લાના તમામ તાલુકાઓમાં વરસાદ નોંધાયો હતો. આ સમયગાળા દરમિયાન વલસાડમાં ૦૫ મીમી, ધરમપુરમાં ૧૦ મીમી, પારડીમાં ૦૫ મીમી અને કપરાડામાં ૦૬ મીમી વરસાદ નોંધાયો હતો. જોકે, ઉમરગામ તાલુકામાં સૌથી વધુ ૩૨ મીમી (૧.૨૮ ઇંચ) અને વાપી તાલુકામાં ૨૮ મીમી (૧.૧૨ ઇંચ) વરસાદ વરસ્‍યો હતો, જેણે વાતાવરણમાં ઠંડક પ્રસરાવી હતી.ઉમરગામમાં વીજ પુરવઠાને અસરઃ ઉમરગામ તાલુકામાં ગુરુવારે મધરાત્રીએ ભારે પવન અને ગાજવીજ સાથે પડેલા સવા ઇંચ વરસાદને કારણે અનેક સ્‍થળોએ વળક્ષો ધરાશાયી થયા હતા. આ વળક્ષો વીજળીના થાંભલાઓ પર પડતાં વીજ પ્રવાહ ખોરવાઈ ગયો હતો. એટલું જ નહીં, ભારે ગાજવીજ અને પવનના કારણે વીજળી પડવાથી કેટલાક ઘરોના વીજ ઉપકરણોને પણ ભારે નુકસાન થયું હોવાના અહેવાલ છે.

ડાંગ અને સાપુતારામાં ધુમ્‍મસનો માહોલઃ

ડાંગ જિલ્લામાં પણ ગુરુવારે મોડી રાત્રિના અરસામાં ધીમીધારે સાર્વત્રિક વરસાદ નોંધાયો હતો. પવનનાં જોરદાર સુસવાટા અને વીજળીના કડાકા-ભડાકા સાથે વરસાદ વરસ્‍યો હતો. ગિરિમથક સાપુતારા ખાતે પણ રાત્રિના અરસામાં અને વહેલી સવારમાં ધીમી ધારનો વરસાદ વરસ્‍યો હતો. વરસાદ બાદ સાપુતારા સંપૂર્ણપણે ધુમ્‍મસની સફેદ ચાદરથી છવાઈ ગયું હતું. સવારના સમયે પણ ધુમ્‍મસ એટલું ગાઢ હતું કે, વાહનચાલકોને દૃશ્‍યતા ઓછી થવાને કારણે મુશ્‍કેલીઓનો સામનો કરવો પડ્‍યો હતો. આ બદલાયેલા વાતાવરણથી ખેડૂતોમાં ખુશી જોવા મળી છે, પરંતુ અચાનક આવેલા વરસાદે કેટલાક વિસ્‍તારોમાં સામાન્‍ય જનજીવનને પણ પ્રભાવિત કર્યું છે.