રાજકોટ : ગુજરાત રાજ્યના ખેડૂતો માટે એક મહત્વપૂર્ણ સમાચાર સામે આવ્યા છે. ખેતીવાડી ખાતાની વિવિધ યોજનાઓ હેઠળના નિદર્શન ઘટકો (Demonstration Components) માટે ઓનલાઈન અરજીઓ મેળવવા માટે આઈ-ખેડૂત પોર્ટલ (i-khedut portal) આગામી બુધવાર, 18 જૂન, 2025 ના રોજ સવારે 10:30 કલાકથી ફરીથી શરૂ કરવામાં આવશે.
નિયામક વિકસતી જાતિ કલ્યાણની કચેરી, ગાંધીનગર દ્વારા આ અંગે માહિતી આપવામાં આવી છે. ખેડૂતો 18 જૂનથી લઈને 1 જુલાઈ, 2025 સુધી (કુલ 14 દિવસ) આ પોર્ટલ પર નિદર્શન ઘટકોમાં લાભ મેળવવા માટે ઓનલાઈન અરજી કરી શકશે.
જે ખેડૂતો આ યોજનાઓનો લાભ લેવા ઈચ્છુક હોય, તેમણે નિર્ધારિત સમયગાળા દરમિયાન https://www.ikhedut.gujarat.gov.in/ પોર્ટલ પર જઈને પોતાની અરજી સબમિટ કરવાની રહેશે. અરજી કર્યા બાદ તેની નકલ પોતાની પાસે સુરક્ષિત રાખવી પણ અનિવાર્ય છે.
આ યોજનાઓનો ઉદ્દેશ્ય ખેડૂતોને આધુનિક ખેતી પદ્ધતિઓ, નવા સંશોધનો અને ટેકનોલોજીથી વાકેફ કરવા અને તેમને અપનાવવા પ્રોત્સાહિત કરવાનો છે, જેથી રાજ્યમાં કૃષિ ઉત્પાદકતા અને ખેડૂતોની આવકમાં વધારો થઈ શકે. રાજ્યના ખેડૂતોને આ સુવર્ણ તકનો લાભ લેવા માટે અપીલ કરવામાં આવી છે.