ગાંધીનગર, ૨૭ જુલાઈ, ૨૦૨૫ : રાજ્યમાં વ્યાપક વરસાદી માહોલ વચ્ચે મુખ્યમંત્રી ભૂપેન્દ્રભાઈ પટેલે આજે સવારે ઓચિંતા સ્ટેટ ઇમરજન્સી કંટ્રોલરૂમની મુલાકાત લીધી હતી. તેમણે રાજ્યમાં વરસાદને કારણે સર્જાયેલી પરિસ્થિતિની જાત માહિતી મેળવીને સંબંધિત જિલ્લાઓના અધિકારીઓને જરૂરી સૂચનાઓ આપી હતી.
મુખ્યમંત્રી ભૂપેન્દ્રભાઈ પટેલનું તાત્કાલિક નિરીક્ષણ: વરસાદી સ્થિતિ પર તંત્રને સતર્ક રહેવા આદેશ
મુખ્યમંત્રી ભૂપેન્દ્રભાઈ પટેલે કંટ્રોલરૂમ ખાતેથી સીધા સુરેન્દ્રનગર, પાટણ, અરવલ્લી, અમદાવાદ, મહેસાણા, બનાસકાંઠા, સાબરકાંઠા અને ખેડા જિલ્લાના કલેકટરો સાથે ટેલીફોનિક વાતચીત કરી હતી. તેમણે દરેક જિલ્લામાં વરસાદને કારણે સર્જાયેલી વર્તમાન સ્થિતિ, પાણી ભરાવા, જનજીવન પર અસર અને રાહત-બચાવ કામગીરી અંગે વિગતવાર માહિતી મેળવી હતી.
તંત્રને એલર્ટ રહેવા કડક સૂચના:
મુખ્યમંત્રી ભૂપેન્દ્રભાઈ પટેલે તમામ જિલ્લા કલેકટરોને કડક સૂચના આપી હતી કે તેઓ એલર્ટ મોડ પર રહીને વરસાદી સ્થિતિ પર સતત નજર રાખે. તેમણે સમગ્ર વહીવટી તંત્રને સતર્ક રહીને સ્ટેટ ઇમરજન્સી ઓપરેશન સેન્ટર (SEOC) સાથે સતત સંપર્કમાં રહેવા અને જિલ્લાની દરેક નાની-મોટી સ્થિતિથી વાકેફ રાખવા આદેશ આપ્યો હતો. આ મુલાકાત રાજ્ય સરકારની વરસાદી પરિસ્થિતિને ગંભીરતાથી લેવાની અને નાગરિકોની સુરક્ષા સુનિશ્ચિત કરવાની કટિબદ્ધતા દર્શાવે છે.