તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
માતા-પિતા પાસેથી સ્કૂલ સર્ટિફિકેટસ મેળવવા ૧૫ વર્ષીય છોકરીની હાઈકોર્ટમાં અરજી
છોકરીએ શિક્ષણના તેના મૂળભૂત અધિકાર અને સન્માન સાથે જીવવાના અધિકારના ઉલ્લંઘનની ફરિયાદ કરી છે
અમદાવાદ, તા.૩૧: વડોદરાની એક ૧૫ વર્ષીય છોકરીએ ગુજરાત હાઈકોર્ટમાં અરજી કરીને ચાઈલ્ડ વેલફેર કમિટીને તેના માતા-પિતા પાસેથી તેના એજ્યુકેશનના સર્ટિફિકેટ્સ મેળવવાનો આદેશ આપવાની માંગ કરી છે, જેથી કરીને તે વડોદરામાં પોતાનો અભ્યાસ ચાલું રાખી શકે.
ટાઈમ્સ ઓફ ઈન્ડિયાના રિપોર્ટ પ્રમાણે, આ છોકરીના માતા-પિતાએ તેનું એડમિશન પાટણની એક સ્કૂલમાં ધોરણ-૧૧માં કરાવ્યું હતું. જોકે, તે પાટણ જવા ન હતી ઈચ્છતી અને તે પોતાના નાના-નાનીને ત્યાં વડોદરામાં રહેવા ઈચ્છતી હતી. તેના નાના-નાનીએ વડોદરાની એક સ્કૂલમાં તેનું પ્રોવિઝનલ એડમિશન લીધું હતું. છોકરીના માતા-પિતા પાટણમાં રહેતા હતા અને તેને વડોદરામાં પોતાના નાના-નાનીને ત્યાં મૂકી હતી, અને તેના અભ્યાસનો ખર્ચો પણ તેઓ જ ઉઠાવતા હતા.
અરજી પ્રમાણે, છોકરીએ ધોરણ-૧૦નો અભ્યાસ પૂરો કર્યો ત્યારબાદ તેના માતા-પિતાએ તેની માર્કશિટ અને લિવિંગ સર્ટિફિકેટ મેળવ્યું હતું, અને તેને તેમની સાથે રહેવા માટે દબાણ કર્યું હતું. તેના માટે છોકરીની માતાએ પાટણની એક સ્કૂલમાં તેનું એડમિશન પણ કરાવ્યું હતું. જોકે, છોકરી પોતાના નાના-નાનીની સાથે વડોદરામાં જ રહેવા અને ભણવા ઈચ્છતી હતી.
છોકરીની માતા અંતે તેને વડોદરા મૂકીને પાટણ જતી રહી હતી, અને ત્યારબાદ તેના નાના-નાનીએ છોકરીના માતા-પિતા પાસેથી તેના સર્ટિફિકેટ્સ મેળવવા માટે વડોદરામાં ચાઈલ્ડ વેલફેર કમિટીમાં અરજી કરી હતી. નાના-નાનીએ છોકરીના ડુપ્લિકેટ સર્ટિફિકેટ મેળવીને વડોદરાની એક સ્કૂલમાં તેનું એડમિશન કરાવ્યું હતું, જે પ્રોવિઝનલ હતું, બાદમાં સ્કૂલે એડમિશન ફાઈનલ કરવા માટે છોકરીના ઓરિજિનલ ડોકયુમેન્ટ્સની માંગ કરી હતી જે તેઓ ન આપી શકતા સ્કૂલે તેનું એડમિશન રદ કર્યું હતું.અંતે પોતાના ઓરિજિનલ ડોકયુમેન્ટ્સ પરત મેળવવા માટે છોકરીએ વકીલ દીપમાલા દેસાઈ મારફતે હાઈકોર્ટમાં અરજી કરી હતી. તેમણે દલીલ કરી હતી કે, છોકરી પોતાનો અભ્યાસ ચાલું રાખવા ઈચ્છે છે પરંતુ તેના ઓરિજિનલ ડોકયુમેન્ટ્સ તેના માતા-પિતા પાસે હોવાથી તે તેને સ્કૂલમાં જમા કરાવી શકી નથી, અને તેને લીધે સ્કૂલે તેનું એડમિશન રદ કરી દીધું છે. જેને લીધે છોકરીનો અભ્યાસ બગડી રહ્યો છે અને તેને માનસિક આઘાતમાં આવી ગઈ છે.
છોકરીએ શિક્ષણના તેના મૂળભૂત અધિકાર અને સન્માન સાથે જીવવાના અધિકારના ઉલ્લંઘનની ફરિયાદ કરી છે. આ ઉપરાંત તેણે માતા-પિતા દ્વારા તરછોડી દેવાના કારણે તેના શાળાકીય શિક્ષણમાં અવરોધ ઉભો થયો હોવાને લીધે જૂવેનાઈલ જસ્ટિસ (કેર એન્ડ પ્રોટેક્શન ઓફ ચિલ્ડ્રન) એક્ટની જોગવાઈઓનો પણ ઉપયોગ કર્યો છે.છોકરીએ ચાઈલ્ડ વેલફેર કમિટીને તેના માતા-પિતા પાસેથી સર્ટિફિકેટ્સ મેળવવા માટે નિર્દેશો માંગવા ઉપરાંત, વડોદરાના શિક્ષણ અધિકારીઓને શાળા દ્વારા તેને ફરીથી એડમિશન આપવા માટે નિર્દેશ આપવાની પણ માંગ કરી છે. પ્રારંભિક સુનાવણી પછી જસ્ટિસ નિખિલ કારિએલે સંબંધિત અધિકારીઓને નોટિસ જારી કરીને આ મામલાની વધુ સુનાવણી ૨૫ ઓગસ્ટના રોજ મુલતવી રાખી હતી.
(4:19 PM IST)
છેલ્લા 8 દિવસમાં સૌથી લોકપ્રિય 
