ભરૂચ એન્ટી કરપ્શન બ્યુરો (ACB)એ ઝઘડિયા તાલુકાના સરસાડ ગામની સરકારી માધ્યમિક શાળાના ઇન્ચાર્જ શિક્ષક કલ્પેશકુમાર બચુભાઈ પટેલને લાંચ લેતા પકડી પાડ્યા છે.

આરોપી શિક્ષકે શાળા પરિવહન યોજના હેઠળ ગાડી ફેરવવા માટે ફરિયાદી પાસેથી દર મહિને ₹3,000 કમિશનની માંગણી કરી હતી. તેમણે ચાલુ વર્ષના ત્રણ મહિનાના ₹9,000, વર્ષ 2024ના મારુતિ વાનના ₹13,000 અને વર્ષ 2025ના ત્રણ મહિનાના ₹9,000 મળી કુલ ₹31,000ની લાંચની માંગણી કરી હતી.

ફરિયાદીએ લાંચ આપવાનો ઇનકાર કરી એસીબીનો સંપર્ક કર્યો હતો. એસીબીએ છટકું ગોઠવ્યું હતું. શાળા કંપાઉન્ડમાં આરોપીએ લાંચની રકમ સ્વીકારતા જ એસીબીની ટીમે તેમને ઝડપી લીધા હતા.

આ કાર્યવાહી ભરૂચ એસીબી પોલીસ ઇન્સ્પેક્ટર એમ.જે. શિંદેના માર્ગદર્શન અને વડોદરા એકમના નાયબ નિયામક પી.એચ. ભેસાણીયાના સુપરવિઝનમાં કરવામાં આવી હતી. આરોપીને ડિટેઇન કરી કાયદેસરની કાર્યવાહી શરૂ કરવામાં આવી છે.