વિરમગામ, તા.૧૯

વિરમગામમાં ચાલી રહેલા લોકમેળામાં એક ગંભીર દુર્ઘટના બની છે. મેળામાં એક યાત્રિક રાઈડ અચાનક તૂટી પડતાં બે લોકો ગંભીર રીતે ઈજાગ્રસ્ત થયા છે. આ ઘટના બાદ તાત્કાલિક ધોરણે પગલાં ભરવામાં આવ્યા છે. ઈજાગ્રસ્તોને સારવાર માટે હોસ્પિટલ ખસેડવામાં આવ્યા છે. સ્થાનિક પોલીસ અને વહીવટી તંત્ર દ્વારા આ ઘટનાની નોંધ લેવામાં આવી છે અને જવાબદારો સામે કડક કાર્યવાહી કરવાની તૈયારીઓ શરૃ કરવામાં આવી છે.દુર્ઘટનાના સમાચાર વાયુવેગે પ્રસરતા લોકોમાં ચિંતા અને ભયનો માહોલ ફેલાઈ ગયો છે.

નાયબ કલેક્ટર દ્વારા તાત્કાલિક હુકમ જારી કરીને વિરમગામમાં ચાલી રહેલા ત્રણેય લોકમેળાનો પરવાનો સ્થગિત કરી દેવામાં આવ્યો છે. આ પગલાને કારણે મેળાની વધુ પ્રવૃતિઓ પર રોક લાગી ગઈ છે, જેનાથી ભવિષ્યમાં આવી કોઈ ઘટના ન બને તે સુનિશ્ચિત થઇ શકે છે.આ દુર્ઘટનાએ મેળામાં ચાલતી રાઇડ્સની સલામતી અને જાળવણી પર ગંભીર સવાલો ઉભા કર્યા છે. આ મામલે પોલીસે ગુનો નોંધીને તપાસ હાથ ધરી છે અને મેળાના આયોજકો તથા રાઈડના સંચાલકો સામે કાયદેસરની કાર્યવાહી કરવામાં આવશે.

 આશા રાખીએ કે ભવિષ્યમાં આવા જાહેર સ્થળોએ સલામતીના નિયમોનું ચુસ્તપણે પાલન થાય જેથી નિર્દોષ નાગરિકોના જીવ જોખમમાં ન મુકાય.