<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 20th August 2025

રાજકોટની એઇમ્‍સ હોસ્‍પિટલમાં પ્રમુખ તરીકે ડો. જે. એસ. ટિટિયાલની નિમણુંક

રાજયસભાના સાંસદ રાજવી કેશરીદેવસિંહ ઝાલા અને રામભાઇ મોકરીયાની જે. પી. નડ્ડા સમક્ષ સફળ રજૂઆત

(લિતેશ ચંદારાણા દ્વારા) વાંકાનેર તા. ર૦: રાજયસભા સાંસદ-રાજવી કેશરીદેવસિંહજી ઝાલા તથા રામભાઇ મોકરીયાએ સફળ રજુઆત કરતા રાજકોટ એઇમ્‍સ હોસ્‍પીટલમાં પ્રમુખ તરીકે ડો. ટિટિયાલની નિમણુંક કરાઇ છે.

વાંકાનેરના રાજવી અને રાજ્‍યસભાના સાંસદ કેશરીદેવસિંહ ઝાલા અને સાંસદ રામભાઇ મોકરીયાએ નવી દિલ્‍હીમાં કેન્‍દ્રીય આરોગ્‍ય અને પરિવાર કલ્‍યાણ મંત્રી શ્રી જે.પી. નડ્ડા સમક્ષ AIIMSના સંચાલનમાં પડતી મુશ્‍કેલીઓ અંગે લેખિત અને રૂબરૂ રજૂઆત કરી હતી. તેમણે સ્‍પષ્ટ રીતે જણાવ્‍યું કે AIIMSમાં પ્રમુખ, નિયામક, વહીવટી અધિકારી અને નાણાકીય સલાહકાર જેવા પદો ખાલી હોવાને કારણે સંસ્‍થા સંપૂર્ણ ક્ષમતા સાથે કાર્યરત થઈ શકતી નથી.

કેન્‍દ્ર સરકારે બંન્‍ને સાંસદોની રજૂઆતને ગંભીરતાથી લઈ ડો. જે.એસ. ટિટિયાલને AIIMS રાજકોટના પ્રમુખ તરીકે નિમણૂક કરી છે. ડો. ટિટિયાલ એક સિનિયર આઈ સ્‍પેશ્‍યાલીસ્‍ટ છે અને ૨૦૧૪માં તેમને પદ્મશ્રીથી સન્‍માનિત કરવામાં આવ્‍યા હતા. તેઓ ભારત નેશનલ આઈ બેંકના ચાર્જ ઓફિસર, દિલ્‍હી ઓપ્‍થેલ્‍મોલોજિકલ સોસાયટીના પ્રમુખ અને અન્‍ય અનેક તબીબી સંસ્‍થાઓમાં મહત્‍વના પદો પર રહી ચૂકયા છે.

હાલમાં AIIMSમાં નિયામક, વહીવટી અધિકારી અને નાણાકીય સલાહકારના પદો હજી ખાલી છે, પરંતુ ડો. ટિટિયાલની વરણીથી સંસ્‍થાના નિર્ણયો ઝડપથી લેવામાં આવશે અને બાકી રહેલી કામગીરીમાં ગતિ આવશે તેવી આશા છે. AIIMSનું સંચાલન વધુ સુદ્રઢ બનશે અને ગુજરાત, ખાસ કરીને સૌરાષ્‍ટ્રના નાગરિકોને ઉચ્‍ચ સ્‍તરની આરોગ્‍યસેવા ઉપલબ્‍ધ થશે.

AIIMS રાજકોટમાં થયેલી આ નિમણૂક માત્ર એક પદભરતી નથીラઆ એક દિશાસૂચક પગલું છે, જે સંસ્‍થાને નવી ઊંચાઈઓ તરફ લઈ જઈ શકે છે. સાંસદ ઝાલાની દ્રઢતા અને કેન્‍દ્ર સરકારની હકારાત્‍મક પ્રતિસાદે સૌરાષ્‍ટ્રના આરોગ્‍ય ક્ષેત્રમાં નવી આશા જગાવી છે. 

(11:58 AM IST)