વડોદરા જિલ્લાની સાવલી એડિશનલ સેશન્સ કોર્ટે એક ઐતિહાસિક અને દાખલારૂપ ચુકાદો આપ્યો છે. કોર્ટે 2021માં થયેલી મારામારીના એક કેસમાં બંને પક્ષના તમામ 47 આરોપીઓને જેલમાં મોકલવાનો આદેશ કર્યો છે. આ ઘટના 2021માં બે જૂથો વચ્ચે મારામારીને કારણે બની હતી, જેના પગલે તમામ 47 લોકો સામે રાયોટિંગની ફરિયાદ નોંધાઈ હતી. આ કેસમાં તમામ આરોપીઓ જામીન પર મુક્ત થયા હતા, પરંતુ કોર્ટની સુનાવણી દરમિયાન કેટલાક આરોપીઓ વારંવાર ગેરહાજર રહેતા હતા. આ મામલાને ગંભીરતાથી લઈને કોર્ટે દસ દિવસ પહેલાં જ તમામ આરોપીઓને કોર્ટમાં હાજર રહેવાનો આદેશ આપ્યો હતો. પરંતુ, બે આરોપીઓ ગેરહાજર રહેતા કોર્ટે આક્રમક વલણ અપનાવ્યું. કોર્ટે નિયમોનું પાલન ન કરનાર આરોપીઓ અને તેમના જામીનદારો સામે કડક કાર્યવાહીના ભાગરૂપે તમામ 47 આરોપીઓને જેલમાં મોકલવાનો હુકમ કર્યો છે. આ નિર્ણય ન્યાયિક પ્રક્રિયામાં બેદરકારી દાખવનાર આરોપીઓ માટે એક કડક ચેતવણી છે.