ગાંધીનગરના દેલવાડ ગામ પાસે ગેરકાયદે રેતી ખનન કરતા શખ્સોએ ખાણ ખનીજ વિભાગની ફ્લાઈંગ સ્ક્વોડ પર હુમલો કર્યો હોવાની ઘટના સામે આવી છે. 

 આ અંગે પ્રાપ્ત માહિતી મુજબ, ફ્લાઈંગ સ્ક્વોડની ટીમ દેલવાડ ગામમાં રેડ કરવા ગઈ હતી. આ દરમિયાન, ટીમે ગેરકાયદે રેતી ભરેલા 7 ડમ્પર જપ્ત કર્યા હતા. ત્યારે જ, 3 વાહનોમાં આવેલા 10 થી 15 જેટલા શખ્સોએ ટીમ પર હુમલો કર્યો હતો અને જપ્ત કરેલા ડમ્પરો બળજબરીપૂર્વક છોડાવી ગયા હતા. આરોપીઓએ ખાણ ખનીજ વિભાગના અધિકારીઓને ધમકીઓ પણ આપી હતી. આ ઘટના બાદ, તમામ ડમ્પરોને સેક્ટર 28 પાસે છોડાવી દેવામાં આવ્યા હતા. આ મામલે પોલીસે ગુનો નોંધી વધુ તપાસ હાથ ધરી છે.