વડોદરા, તા.૨૩

ગુજરાતના વડોદરમાં રહેતી ૨૧ વર્ષીય ફેશન ડિઝાઇનિંગની વિદ્યાર્થિની ખુશી પઠાણે ભારતીય સૈનિકો માટે સૌર ઊર્જાથી ચાલતી અનોખી વર્દી તૈયાર કરી છે. પોતાના રિસર્ચ પ્રોજેક્ટ હેઠળ ખુશીએ આ વર્દી બનાવી છે. આ ખાસ વર્દીની મદદથી સૈનિક ન ફક્ત પોતાના ઉપકરણોને ચાર્જ કરી શકશે પરંતુ, તેની મદદથી દર વખતે પોતાના યુનિટ સાથે જોડાઈ રહેવામાં પણ મદદ મળશે.

ખુશીએ આ વર્ષે ફેબ્રુઆરીમાં ખાસ વર્દી પર કામ કરવાનું શરૃ કર્યું અને છ મહિનાની મહેનત બાદ ડિઝાઇન પૂરી કરી. આ વર્દીને ડિઝાઇન કરતા પહેલા તેણે ૧૦-૧૨ સામાન્ય લોકો અને ચારથી પાંચ સેવારત અધિકારીઓનું માર્ગદર્શન પણ લીધું હતું.

નોંધનીય છે કે, ખુશીની આ ખાસ ઊર્જા ઉત્પન્ન કરતી વર્દીમાં વાયર માટે ખાસ જગ્યા બનાવવામાં આવી છે. જેનાથી વર્દી હલકી અને લવચક બને છે અને તેની સૈન્ય ગરિમા પણ જળવાઈ રહે છે.

આ વર્દી હાલ પરીક્ષણના તબક્કામાં છે. તેની આશા છે કે, ભારતીય સેના તેના આ ઇનોવેશનને અપનાવે.