ગાંધીનગર: ગુજરાત સરકારના ગૃહ વિભાગ દ્વારા તાજેતરમાં એક નવો હુકમ જારી કરવામાં આવ્યો છે, જેમાં કેટલાક વરિષ્ઠ પોલીસ અધિકારીઓને વધારાનો હવાલો સોંપવામાં આવ્યો છે. આ હુકમ અનુસાર, તા. ૧૮/૦૮/૨૦૨૫ના જાહેરનામાથી પોલીસ મહાનિરીક્ષક, સી.આઈ.ડી. (ક્રાઈમ અને રેલ્વેઝ), ગાંધીનગર તરીકે બદલી પામેલા શ્રી મનોજ અગ્રવાલ, આઈ.પી.એસ.ના ખાલી પડેલા પદ, એટલે કે નિયામક, સિવિલ ડિફેન્સ અને કમાન્ડન્ટ જનરલ, હોમ ગાર્ડ્સ, અમદાવાદનો વધારાનો હવાલો હવે શ્રી પિયુષ પટેલ, આઈ.પી.એસ.ને સોંપવામાં આવ્યો છે. શ્રી પિયુષ પટેલ હાલમાં નિયામક, લાંચ રૂશ્વત વિરોધી બ્યુરો, અમદાવાદ તરીકે કાર્યરત છે અને તેઓ તેમની હાલની કામગીરી ઉપરાંત આ વધારાનો હવાલો સંભાળશે.
વધુમાં, ગૃહ વિભાગના તા. ૧૮/૦૮/૨૦૨૫ના જ અન્ય જાહેરનામાથી નિમણૂક માટે પ્રતીક્ષા હેઠળ મૂકવામાં આવેલા શ્રી આર. વી. ચુડાસમા, આઈ.પી.એસ.ને પણ વધારાનો ચાર્જ યથાવત રાખવામાં આવ્યો છે. શ્રી ચુડાસમા, જેઓ નાયબ પોલીસ મહાનિરીક્ષક, રાજ્ય અનામત પોલીસ દળ, ગૃપ-૯, વડોદરા તરીકે ફરજ બજાવતા હતા, તેઓ પોલીસ મહાનિરીક્ષક (હથિયારી એકમો), વડોદરાની ખાલી જગ્યાનો વધારાનો હવાલો પણ ધરાવતા હતા. આ નવા હુકમ મુજબ, આ વધારાનો હવાલો અન્ય કોઈ હુકમો ન થાય ત્યાં સુધી તેમની પાસે યથાવત રહેશે. આ હુકમ ગુજરાતના રાજ્યપાલશ્રીના નામે અને તેમના આદેશથી ઉપસચિવ અમિત રાવલ દ્વારા જારી કરવામાં આવ્યો છે.