બનાસકાંઠા જિલ્લાના અમીરગઢ તાલુકાના ધનપુરા વિરમપુર ગામે ભારે વરસાદના કારણે એક મકાન ધરાશાયી થયું છે, જેમાં પુનીબેન કાનાભાઈ રાઠોડ નામની આધેડ મહિલાનું દટાઈ જવાથી દુઃખદ મોત નીપજ્યું. ભારે વરસાદે ગામમાં હાહાકાર મચાવ્યો અને આ ઘટનાએ સ્થાનિકોમાં શોકનું મોજું ફેલાવ્યું છે. જિલ્લા વહીવટ અને પોલીસે ઘટનાસ્થળે પહોંચીને તપાસ શરૂ કરી કરી હોવાની માહિતી સામે આવી રહી છે.

ધનપુરા વિરમપુર ગામમાં ચોમાસાની સિઝનમાં ભારે વરસાદને કારણે પુનીબેન કાનાભાઈ રાઠોડનું મકાન રવિવારે સવારે ધરાશાયી થયું. ગુજરાત હવામાન વિભાગના અહેવાલ મુજબ, અમીરગઢ અને આસપાસના વિસ્તારોમાં છેલ્લા 24 કલાકમાં ભારે વરસાદ નોંધાયો, જેના કારણે નબળા અને કાચા મકાનોને ભારે નુકસાન થયું છે. પુનીબેન તેમના ઘરમાં હતા ત્યારે મકાનની દિવાલ અને છત ધસી પડતાં તેઓ દટાઈ ગયા જેના કારણે તેમનું ઘટનાસ્થળે જ મોત નીપજ્યું છે. સ્થાનિકોએ તાત્કાલિક બચાવ કામગીરી શરૂ કરી પરંતુ પુનીબેનને બચાવી શકાયા નહી.

અમીરગઢ પોલીસ અને ફાયર બ્રિગેડની ટીમો ઘટનાસ્થળે પહોંચી અને NDRF (નેશનલ ડિઝાસ્ટર રિસ્પોન્સ ફોર્સ)ની ટીમને પણ સ્ટેન્ડબાય પર રાખવામાં આવી છે. પ્રાથમિક તપાસમાં જાણવા મળ્યું કે મકાન જૂનું અને નબળું હતું, જે ભારે વરસાદનો સામનો ન કરી શક્યું.

 બનાસકાંઠા જિલ્લા વહીવટે ઘટનાની ગંભીરતાને ધ્યાનમાં રાખીને અમીરગઢમાં રેડ એલર્ટ જાહેર કર્યું છે. જિલ્લા કલેકટરએ જણાવ્યું, "ધનપુરા વિરમપુરમાં થયેલી દુર્ઘટના દુઃખદ છે. પરિવારને તાત્કાલિક રાહત અને સહાય પૂરી પાડવામાં આવશે, અને નબળા મકાનોનું સર્વે કરવા સૂચના આપવામાં આવી છે." NDRF અને SDRFની ટીમોને ગામમાં તૈનાત કરવામાં આવી છે, અને ફાયર બ્રિગેડ તથા 108 એમ્બ્યુલન્સ સેવા કટોકટીની સ્થિતિમાં તૈયાર છે.