સુરતના ઉમરા વિસ્તારમાં આવેલી ધનજીશા રૂસ્તમજી ઉમરીગર સ્કૂલમાં એક ચોંકાવનારી ઘટના સામે આવી છે, જ્યાં એક વિદ્યાર્થી પર લોખંડના સળિયા વડે હુમલો કરવામાં આવ્યો. આ ઘટનામાં સ્કૂલના જ એક વિદ્યાર્થીએ બીજા વિદ્યાર્થી પર હુમલો કર્યો હતો. પ્રાપ્ત માહિતી અનુસાર, સ્કૂલના GS (જનરલ સેક્રેટરી) અને ઉપ-GS વચ્ચે કોઈ બાબતે ઝઘડો થયો હતો. આ ઝઘડામાં એક અન્ય વિદ્યાર્થી વચ્ચે પડતાં તેના પર લોખંડના સળિયાથી હુમલો કરવામાં આવ્યો હતો, જેના કારણે તેને ઈજા થઈ છે. આ ઘટનાની જાણ થતાં જ પીડિત વિદ્યાર્થીના વાલીઓ અને અન્ય વાલીઓ સ્કૂલ પહોંચ્યા હતા અને ઉગ્ર રજૂઆત કરી હતી. વાલીઓએ હુમલો કરનાર વિદ્યાર્થી અને ખાસ કરીને સ્કૂલના ઉપ-GS સામે કડક કાર્યવાહી કરવાની અને પોલીસ ફરિયાદ નોંધાવવાની માંગ કરી છે.