ગુજરાતના રાજકીય વાતાવરણમાં ફરી એકવાર ગરમાવો આવ્યો છે. ભાજપના નેતા અને ગાંધીનગર દક્ષિણના ધારાસભ્ય અલ્પેશ ઠાકોરે ગુજરાત ક્ષત્રિય ઠાકોર સેનાને પુનઃસક્રિય કરવાના પ્રયાસો તેજ કર્યા છે. આ માટે તેમણે 20 સપ્ટેમ્બર 2025ના રોજ ગાંધીનગર ખાતે ઠાકોર સેનાની એક મહત્વપૂર્ણ બેઠક બોલાવી છે. આ બેઠકમાં ગુજરાતભરમાંથી ઠાકોર સેનાના 500થી વધુ હોદ્દેદારો અને અગ્રણીઓ હાજર રહેશે, જેમાં આગામી દિવસોના કાર્યક્રમો અને રણનીતિ નક્કી કરવામાં આવશે 

ગુજરાત ક્ષત્રિય ઠાકોર સેના જેની સ્થાપના અલ્પેશ ઠાકોરે 2011માં કરી હતી, જે ઠાકોર સમાજના સામાજિક, શૈક્ષણિક અને આર્થિક વિકાસ માટે કામ કરે છે. આ સંગઠને ભૂતકાળમાં અનામત, વ્યસનમુક્તિ અને શિક્ષણ જેવા મુદ્દાઓ પર મોટા પાયે આંદોલનો કર્યા છે. અલ્પેશ ઠાકોરે 2017માં કોંગ્રેસમાં જોડાયા બાદ અને 2019માં ભાજપમાં પ્રવેશ્યા પછી ઠાકોર સેનાની પ્રવૃત્તિઓ ઓછી થઈ ગઈ હતી. હવે આ બેઠક દ્વારા તેઓ ઠાકોર સમાજને ફરી એક મંચ પર લાવવા અને સંગઠનની ભૂમિકાને મજબૂત કરવાનો પ્રયાસ કરી રહ્યા છે.

આ બેઠક રાજકીય અને સામાજિક રીતે મહત્વની માનવામાં આવે છે, કારણ કે ઠાકોર સમાજ ગુજરાતના ઉત્તર અને મધ્ય ગુજરાતના અનેક વિસ્તારોમાં મોટી સંખ્યામાં છે. તો રાજકીય રીતે પ્રભાવશાળી પણ છે. 2022ની ગુજરાત વિધાનસભા ચૂંટણીમાં અલ્પેશ ઠાકોરે ગાંધીનગર દક્ષિણ બેઠક પરથી 43,064 મતોની સરસાઈથી જીત મેળવી હતી, જે તેમના સમાજ પરના પ્રભાવને દર્શાવે છે. આ બેઠક દ્વારા ઠાકોર સેના આગામી ચૂંટણીઓ અને સામાજિક મુદ્દાઓ પર નવી રણનીતિ ઘડવાની તૈયારીમાં છે.

ગુજરાત ક્ષત્રિય ઠાકોર સેનાએ અગાઉ વ્યસનમુક્તિ, ખાસ કરીને દારૂના વ્યસન સામે મોટા પાયે અભિયાનો ચલાવ્યા હતા. 2014માં અલ્પેશ ઠાકોરે ગુજરાતમાં ગેરકાયદે દારૂના વેપાર સામે આંદોલન શરૂ કર્યું હતું, અને 2016-17માં પાટીદાર અનામત આંદોલનની સામે OBC-SC-ST એકતા મંચની રચના કરી હતી. આ સંગઠનના લગભગ 7 લાખ સભ્યો હોવાનું જણાવાયું હતું. જોકે, અલ્પેશના ભાજપમાં જોડાયા પછી સેનાની પ્રવૃત્તિઓ મંદ પડી હતી, પરંતુ હવે આ બેઠકથી તે ફરીથી સક્રિય થવાના સંકેત મળી રહ્યા છે.

આ બેઠકને લઈને રાજકીય વર્તુળોમાં ભારે ઉત્સુકતા જોવા મળી રહી છે. નિષ્ણાતોનું માનવું છે કે અલ્પેશ ઠાકોર ઠાકોર સમાજની રાજકીય શક્તિને એકત્રિત કરીને ભાજપની સ્થિતિને વધુ મજબૂત કરવાનો પ્રયાસ કરી શકે છે. આ ઉપરાંત, આગામી સ્થાનિક ચૂંટણીઓ અને 2027ની વિધાનસભા ચૂંટણીઓને ધ્યાનમાં રાખીને ઠાકોર સેના નવા મુદ્દાઓ અને કાર્યક્રમો પર ધ્યાન કેન્દ્રિત કરી શકે છે. બેઠકમાં શિક્ષણ, રોજગાર, અને સામાજિક ન્યાય જેવા મુદ્દાઓ પર ચર્ચા થવાની સંભાવના છે.