અમદાવાદ, તા.૨૨

ગુજરાતમાં ચોમાસાના અંતિમ તબક્કામાં પણ વરસાદનો પ્રકોપ જોવા મળી શકે છે. હવામાન વિભાગે રાજ્યમાં વરસાદના વધુ બે રાઉન્ડની આગાહી કરી છે. જેમાં ૨૨ અને ૨૩ સપ્ટેમ્બરના રોજ દક્ષિણ ગુજરાતમાં વરસાદી ઝાપટા પડી શકે છે. પરંતુ સૌથી મોટો વરસાદી રાઉન્ડ ૨૭ સપ્ટેમ્બરથી ૫ ઓક્ટોબર સુધીમાં આવવાની શક્યતા છે, જે પૂર્વીય દેશોમાંથી આવેલા એક ટાઈફૂનના અવશેષોને કારણે થશે. આ દરમિયાન રાજ્યના મોટાભાગના વિસ્તારોમાં ભારેથી અતિભારે વરસાદની સંભાવના છે, જેમાં દક્ષિણ ગુજરાત અને સૌરાષ્ટ્રના ભાગોમાં ૪ ઇંચ કે તેથી વધુ વરસાદ પડી શકે છે.

ગુજરાતમાં હાલમાં ચોમાસાની વિદાયની પ્રક્રિયા અટકી ગઈ છે અને હવામાન વિભાગે વરસાદના વધુ બે તબક્કાની આગાહી કરી છે. આ આગાહી ખાસ કરીને ખેડૂતો અને નવરાત્રિના આયોજકો માટે ચિંતાનો વિષય બની શકે છે.

આજથી એટલે કે ૨૨ અને ૨૩ સપ્ટેમ્બરના રોજ દક્ષિણ ગુજરાતના કેટલાક ભાગોમાં ૧ થી ૨ ઇંચ જેટલો સામાન્ય વરસાદ પડી શકે છે. ત્યારબાદ, ૨૪ અને ૨૫ સપ્ટેમ્બર સુધીમાં મધ્ય ગુજરાત, દક્ષિણ ગુજરાત અને સૌરાષ્ટ્રના કેટલાક ભાગોમાં પણ હળવા વરસાદી ઝાપટા પડી શકે છે. અમદાવાદ અને ગાંધીનગર જેવા શહેરોમાં પણ છૂટાછવાયા ઝાપટાની શક્યતા છે.

બંગાળના ઉપસાગરમાં પૂર્વીય દેશો તરફથી આવેલા ટાઈફૂનના અવશેષોના કારણે એક નવી વરસાદી સિસ્ટમ સક્રિય થઈ રહી છે. જેના પગલે, રાજ્યના મોટાભાગના વિસ્તારોમાં ૨૭ સપ્ટેમ્બરથી ૫ ઓક્ટોબર સુધીમાં ભારેથી અતિભારે વરસાદ પડી શકે છે.

આ વરસાદ વીજળીના કડાકા-ભડાકા અને ભારે પવન સાથે પડવાની શક્યતા છે, જેમાં પવનની ગતિ ૪૦થી ૬૦ કિ.મી. પ્રતિ કલાક સુધી પહોંચી શકે છે. આ રાઉન્ડમાં ખાસ કરીને દક્ષિણ ગુજરાતના ભાગો જેમ કે ભરૃચ, જંબુસર, અને સુરતમાં ભારે વરસાદની સંભાવના છે. દક્ષિણ સૌરાષ્ટ્ર અને મધ્ય ગુજરાતમાં પણ ગાજવીજ સાથે વરસાદની શક્યતા છે. કેટલાક વિસ્તારોમાં ૪ ઇંચ કે તેથી વધુ વરસાદ પણ પડી શકે છે.

આ વરસાદની અસર ખેતીવાડી પર પણ જોવા મળી શકે છે. સૌરાષ્ટ્રના કેટલાક વિસ્તારોમાં મગફળીના પાકને નુકસાન થવાની શક્યતા છે, જ્યારે કેટલાક વિસ્તારોમાં આ વરસાદ પાક માટે ફાયદાકારક પણ સાબિત થઈ શકે છે. વરસાદની આગાહી નવરાત્રિના આયોજકો માટે પણ ચિંતાજનક છે, કારણ કે ભારે વરસાદ ગરબાના આયોજનમાં વિઘ્ન લાવી શકે છે.

હવામાન વિભાગે ઓક્ટોબર મહિનામાં પણ વરસાદની શક્યતા વ્યક્ત કરી છે. ૯ થી ૧૩ ઓક્ટોબર દરમિયાન કેટલાક ભાગોમાં ગાજવીજ સાથે વરસાદ પડી શકે છે. આ આગાહીઓને જોતા, ખેડૂતો અને નાગરિકોએ સાવચેતી રાખવી જરૃરી છે.