અમદાવાદ મ્યુનિસિપલ કોર્પોરેશન (AMC)ના કર્મચારીઓ તેમની પડતર ૧૯ માંગણીઓ સાથે વિરોધ યથાવત રાખી રહ્યા છે. નોકર મંડળે કમિશનર બંછાનિધિ પાની પાસે આ મુદ્દે ચર્ચા કરવા માટે સમય માંગ્યો હતો, પરંતુ કમિશનર દ્વારા કોઈ પ્રતિસાદ ન મળતાં, આજે AMC કાર્યાલય ખાતે પ્રતીક ઉપવાસ શરૂ કરવામાં આવ્યા છે. નોકર મંડળના પાંચ સભ્યો આગામી સાત દિવસ સુધી પ્રતીક ઉપવાસ પર રહેશે. આ પહેલાં પણ નોકર મંડળે મહારેલી યોજીને આવેદનપત્ર પાઠવ્યું હતું, પરંતુ કોઈ નિવારણ ન આવતા તેમણે આ આંદોલનાત્મક પગલું ભર્યું છે. જો આગામી દિવસોમાં તેમની માંગણીઓનું નિરાકરણ નહીં આવે, તો તેઓ વધુ ઉગ્ર આંદોલન કરવાની ચીમકી ઉચ્ચારી છે.