નવસારીમાંથી સામે આવેલા એક કિસ્સામાં ભાજપના યુવા નેતા ભાવેશ ઉર્ફે સોનુ પાટીલ તેમના જન્મદિવસની ઉજવણીને કારણે વિવાદમાં સપડાયા છે. પ્રાપ્ત માહિતી અનુસાર, ભાવેશ ઉર્ફે સોનુ પાટીલે વિજલપોરના શિવાજી ચોક પાસે જાહેર માર્ગની વચ્ચોવચ પોતાનો જન્મદિવસ ઉજવ્યો હતો. આ ઉજવણીમાં ફિલ્મી ઢબે કેક કાપવામાં આવી હતી અને મોટા પાયે આતિશબાજી પણ કરવામાં આવી હતી. આ સમગ્ર ઘટનાનો વીડિયો સોશિયલ મીડિયા પર વાયરલ થયો છે, જેના કારણે લોકોમાં ચર્ચાનો વિષય બન્યો છે.

આ જન્મદિવસની ઉજવણીમાં ભાજપના કેટલાક સ્થાનિક નેતાઓ પણ હાજર રહ્યા હોવાનું જાણવા મળ્યું છે. આ ઉજવણીને કાયદાનું ખુલ્લેઆમ ઉલ્લંઘન માનવામાં આવી રહ્યું છે, કારણ કે જાહેર માર્ગ પર આવી પ્રવૃત્તિઓ ટ્રાફિક અને સામાન્ય જનજીવનને અવરોધે છે, તેમજ અગમ્ય કારણોસર જોખમ પણ ઊભું કરી શકે છે. ભારતીય જનતા પાર્ટી, જે સામાન્ય રીતે શિસ્તબદ્ધ પક્ષ તરીકે ઓળખાય છે, તેના કાર્યકર્તાઓ દ્વારા આવા અતિ ઉત્સાહમાં આવીને કરાતા કાર્યો અગાઉ પણ ચર્ચાનો વિષય બનતા રહ્યા છે અને કાયદાના સંઘર્ષમાં આવતા રહ્યા છે.