બનાસકાંઠા: ફટાકડા વેપારી મુકેશ ઠક્કરે 'હપ્તા'ના દબાણ અને રકઝક બાદ હૃદયરોગના હુમલાથી જીવ ગુમાવ્યો; ખંડણીખોર પત્રકાર માફિયાઓ સામે કડક કાર્યવાહીની માંગ ઉઠી છે.

વિસ્તૃત વિગતો જોઈએ તો બનાસકાંઠાના ડીસા શહેરમાં ખંડણીખોર કથિત પત્રકારોના ત્રાસને કારણે એક ફટાકડાના વેપારીનું મોત નિપજતાં સમગ્ર પંથકમાં ખળભળાટ મચી ગયો છે અને વેપારી આલમમાં પ્રચંડ રોષ ફેલાયો છે. વેપારી એસોસિયેશનના ઉગ્ર વિરોધને પગલે પોલીસે આ મામલે ૬ કથિત પત્રકારો સામે ખંડણી, ધમકી અને અન્ય સંબંધિત કલમો હેઠળ ગુનો દાખલ કરી ૪ આરોપીઓની તાત્કાલિક ધરપકડ કરી છે.

ખંડણી માટે દબાણ અને હંગામો:

પ્રાપ્ત વિગતો અનુસાર, ડીસાના ખાડિયા વિસ્તારમાં કનૈયા સિઝનેબલ સ્ટોર્સ ચલાવતા વેપારી મુકેશભાઈ ઠક્કર પાસે દિવાળી નિમિત્તે ફટાકડાનો ધંધો શરૂ કરતાની સાથે જ કથિત પત્રકારોનું જૂથ ખંડણી માંગવા પહોંચ્યું હતું.

વેપારીના ભાગીદારે પોલીસ ફરિયાદમાં નોંધાવ્યા મુજબ, દિલીપ ત્રિવેદી અને પારસ મહારાજ નામના કથિત પત્રકારો સહિત છ જેટલા આરોપીઓ હપ્તા પેટે ₹૨૫,૦૦૦ની ખંડણી માંગી હતી. જો પૈસા નહીં આપવામાં આવે તો પેપરમાં છાપીને ધંધો કરવા નહીં દેવાની ધમકી આપી હતી. વેપારીએ પ્રથમ તબક્કે ₹૧૦,૦૦૦ આપ્યા હોવા છતાં, બાકીના ₹૧૫,૦૦૦ માટે દબાણ ચાલુ રાખ્યું હતું.

રકઝક બાદ હૃદયરોગનો હુમલો:

શુક્રવારની રાત્રે, દિલીપ ત્રિવેદી, પારસ મહારાજ ઉપરાંત તપન જયસ્વાલ, મેહુલ ખત્રી, રોહિત ઠાકોર અને હિતેશ રાજપૂત નામના અન્ય ચાર કથિત પત્રકારો દુકાને પહોંચ્યા હતા અને બાકીના પૈસા માટે હંગામો મચાવ્યો હતો. વેપારી અને સ્ટાફ સાથે થયેલી આ રકઝક અને સતત ધમકીભર્યા દબાણ બાદ વેપારી મુકેશ ઠક્કરને એકાએક છાતીમાં દુ:ખાવો ઉપડ્યો હતો અને તેઓ ઢળી પડ્યા હતા. તેમને તાત્કાલિક હોસ્પિટલ લઈ જવાયા હતા, જ્યાં ફરજ પરના તબીબે તેમને મૃત જાહેર કર્યા હતા.

વેપારી એસોસિયેશનનો ઉગ્ર વિરોધ:

વેપારીના મૃત્યુના સમાચાર ફેલાતા જ ફટાકડા વેપારી એસોસિયેશન અને અન્ય વેપારી સંગઠનોના સભ્યોમાં પ્રચંડ રોષ ફાટી નીકળ્યો હતો. વેપારીઓએ જ્યાં સુધી તમામ ૬ આરોપીઓ સામે ગુનો નોંધી તેમની ધરપકડ ન થાય ત્યાં સુધી લાશનો સ્વીકાર ન કરવાની ચીમકી આપી હતી.

વેપારીઓના ઉગ્ર વિરોધના પગલે ડીસા પોલીસે તાત્કાલિક ગતિવિધિ તેજ કરી હતી અને તમામ છ આરોપીઓ સામે આઇપીસીની કલમ ૩૮૪ (ખંડણી), ૫૦૬ (ધમકી) સહિતની કલમો હેઠળ ગુનો નોંધીને ચાર આરોપીઓની ધરપકડ કરી હતી. 

આ ઘટનાએ પત્રકારત્વના નામે ખંડણી વસૂલતા તત્વો સામે કડક કાર્યવાહીની માંગને વધુ બળ આપ્યું છે. બાકીના બે આરોપીઓને ઝડપી પાડવા માટે પોલીસે ચક્રો ગતિમાન કર્યા છે.