અંકલેશ્વર નજીક નર્મદા નદીમાં આજે સવારે બનેલી ઘટનાએ સ્થાનિક વિસ્તારમાં ચકચાર મચાવી હતી. દિવાળી પર્વ પૂર્વે એક મહિલાએ જીવ લેવાનો પ્રયાસ કરતાં નદીના કિનારે તાત્કાલિક દોડધામ મચી ગઈ હતી. જોકે, સમયસર હાજર રહેલા નાવિકોની સતર્કતાને કારણે મહિલાનો જીવ બચી ગયો હતો. મહિલાએ આપઘાતનો પ્રયાસ કર્યો હોવાની જાણ થતાં પોલીસ પહોંચી હતી અને આગળની કાર્યવાહી હાથ ધરી હતી.

મળતી માહિતી મુજબ, અંકલેશ્વર છેડે આવેલા નર્મદા મૈયા બ્રિજ નજીકના કોવિડ સ્મશાન પાસે સવારે મહિલાએ નદીમાં છલાંગ લગાવવાનો પ્રયાસ કર્યો હતો. પ્રતિદિન નદીના કિનારે માછલી પકડતા સ્થાનિક નાવિકોએ મહિલાને શંકાસ્પદ હાલતમાં જોઈ તરત જ સતર્કતા દાખવી હતી. મહિલાએ બે વાર નદીમાં કૂદવાનો પ્રયાસ કર્યો હતો, પરંતુ નાવિકોએ સમયસર પકડી રાખી જીવ બચાવ્યો હતો. ઘટનાની જાણ થતા જ સામાજિક કાર્યકર ધર્મેશ સોલંકીએ તરત જ પોલીસને માહિતી આપી હતી.

અંકલેશ્વર પોલીસ મથકનો કાફલો ઘટનાસ્થળે પહોંચી ગયો હતો અને મહિલાને કિનારે સુરક્ષિત સ્થાન પર લાવી પૂછપરછ શરૂ કરી હતી. સાથે જ ઈમરજન્સી સેવા 112ની ટીમ પણ તાત્કાલિક પહોંચી મહિલાનું કાઉન્સેલિંગ કરી માનસિક રીતે શાંત કરવાની કોશિશ કરી હતી. પ્રાથમિક પૂછપરછમાં મહિલાએ જણાવ્યું હતું કે તે જીવનની પરિસ્થિતિઓથી કંટાળી જઈ આપઘાત કરવા નક્કી કર્યું હતું. હાલ પોલીસે મહિલાની ઓળખ મેળવવા સાથે તેના વાલી-વારસનો સંપર્ક કરવાનો પ્રયાસ શરૂ કર્યો છે. પોલીસની પ્રાથમિક તપાસ મુજબ મહિલાનું નિવાસસ્થાન અંકલેશ્વર વિસ્તારનું હોવાનું માનવામાં આવે છે.

સ્થાનિક નાગરિકો અને નાવિકોની સમયસરની સતર્કતાને કારણે આજે એક જીવ બચી ગયો છે. પોલીસ મહિલાને વધુ માનસિક સહાય મળી રહે તે માટે કાઉન્સેલિંગ અને સામાજિક સંસ્થાઓની મદદ પણ લઈ રહી છે. દિવાળી જેવા આનંદના તહેવાર પહેલા બનેલી આ દુઃખદ ઘટના માનવતા માટે ચેતવણીરૂપ બની છે કે માનસિક તણાવના સમયમાં વાતચીત અને સહકાર કેટલો અગત્યનો છે.