અમદાવાદ: અમદાવાદ મ્યુનિસિપલ કોર્પોરેશનના અનેક કૌભાંડોનો પર્દાફાશ કરનાર જાણીતા દિવ્યાંગ RTI (માહિતી અધિકાર) કાર્યકર્તા રસિક પરમારની કથિત હત્યાના મામલે ભારતના રાષ્ટ્રીય માનવાધિકાર પંચે (NHRC) સ્વતઃ સંજ્ઞાન લઈને મોટી કાર્યવાહી કરી છે. પંચે ગુજરાતના પોલીસ મહાનિર્દેશક (DGP)ને નોટિસ પાઠવીને આ સમગ્ર ઘટનાનો વિગતવાર અહેવાલ બે અઠવાડિયામાં રજૂ કરવા આદેશ આપ્યો છે.
મળતી વિગતો મુજબ, રસિક પરમારનું ૧૨ ઑક્ટોબરના રોજ તેમના સંબંધીના નિવાસસ્થાન પાસેથી અજાણ્યા લોકો દ્વારા અપહરણ કરવામાં આવ્યું હતું. મંગળવારે મોડી સાંજે બનાસકાંઠાના થરાદની કેનાલમાંથી તેમનો મૃતદેહ મળી આવ્યો હતો.
પ્રાથમિક દ્રષ્ટિએ આ ઘટનાને આપઘાત માનવામાં આવતી હતી, પરંતુ મૃતકના ભત્રીજાએ હત્યાની શંકા વ્યક્ત કરીને પોલીસમાં ફરિયાદ નોંધાવી હતી, જેના કારણે આ કેસમાં રહસ્ય ઘેરું બન્યું છે.
મીડિયા અહેવાલોની ગંભીરતાને ધ્યાનમાં લઈને રાષ્ટ્રીય માનવાધિકાર પંચે અવલોકન કર્યું છે કે, જો સમાચારની વિગતો સાચી હોય તો તે પીડિતના માનવાધિકારોના ગંભીર ઉલ્લંઘનનો મુદ્દો ઊભો કરે છે.
મીડિયા અહેવાલો મુજબ, મૃતક RTI કાર્યકરે અગાઉ ઝૂંપડપટ્ટી પુનર્વિકાસ પરિયોજનામાં સ્થાનિક બિલ્ડરો દ્વારા કરાયેલા કથિત નકલી લાભાર્થી દસ્તાવેજો અને અન્ય અનિયમિતતાઓ અંગે ફરિયાદો નોંધાવી હતી. આના પરથી શંકા ઊભી થાય છે કે તેમના મૃત્યુ પાછળ આ કૌભાંડો સંબંધિત કારણ હોઈ શકે છે.
ગુજરાત DGPને મોકલેલી નોટિસમાં પંચે આ સમગ્ર મામલે તાત્કાલિક અને યોગ્ય પગલાં લેવા તેમજ તપાસની પ્રગતિ વિશે માહિતી આપવા જણાવ્યું છે.