અરવલ્લીની ગિરિમાળાઓમાં સ્થિત માઁ જગતજનની અંબાનું મંદિર દિવાળી વેકેશન દરમિયાન ભક્તોના ધસારાથી છલકાઈ ગયું હતું. આ વેકેશનમાં 8 લાખથી વધુ શ્રદ્ધાળુઓએ માઁ અંબાના દર્શન કરીને ધન્યતા અનુભવી હતી.

ભક્તોએ યથાશક્તિ દાન આપીને મંદિરના ભંડારને છલકાવી દીધો છે, જેમાં દિવાળી વેકેશનથી લઈને હાલ સુધીમાં મંદિરને કુલ ₹1.25 કરોડ જેટલું માતબર દાન મળ્યું છે.

ગુપ્ત દાન: દાનપેટીમાંથી ₹1.1 કરોડનું ગુપ્ત દાન મળ્યું છે.પાવતી દાન: પાવતી સ્વરૂપે ₹25 લાખનું દાન ટેમ્પલ ઓફિસ ખાતે આપવામાં આવ્યું છે.સોનાનું દાન: રોકડ ઉપરાંત, ભંડારામાં ગુપ્ત દાન તરીકે 400 ગ્રામ જેટલું સોનું પણ પ્રાપ્ત થયું છે.

જોકે, મંદિર ટ્રસ્ટના વહીવટદાર કૌશિક મોદીએ જણાવ્યું હતું કે, આ રકમ છેલ્લા બે વર્ષના દિવાળી વેકેશનના દાનના આંકડા કરતાં ઓછી છે.

અગાઉના વર્ષોમાં પણ દિવાળી વેકેશન દરમિયાન મોટું દાન નોંધાયું હતું:

અંબાજીમાં 2023માં દાન: કુલ ₹2.68 કરોડનું દાન મળ્યું હતું, જેમાં એક અમદાવાદના ભક્તે ₹10.16 લાખની સોનાની લગડી અર્પણ કરી હતી.

અંબાજીમાં 2024માં દાન: કુલ ₹1.65 કરોડની રોકડ સાથે સોના-ચાંદીનું દાન નોંધાયું હતું.

આટલી મોટી સંખ્યામાં આવેલા ભક્તોને તકલીફ ન પડે તે માટે અંબાજી મંદિર દેવસ્થાન ટ્રસ્ટ દ્વારા સુંદર વ્યવસ્થા કરવામાં આવી હતી.

દર્શનની વ્યવસ્થા: ભક્તો સરળતાથી દર્શન કરી શકે તે માટે અનેક લાઈનો ગોઠવવામાં આવી હતી.સુરક્ષા અને ટ્રાફિક: પોલીસ વિભાગ સાથે મળીને સુરક્ષાકર્મીઓની સંખ્યામાં વધારો કરવામાં આવ્યો હતો અને ટ્રાફિક મેનેજમેન્ટની વ્યવસ્થાઓ સુચારુ રૂપે કરવામાં આવી હતી.પ્રસાદ વિતરણ: ભીડને જોઈને મોહનથાળ પ્રસાદ સરળતાથી મળી રહે તે માટે પ્રસાદના વધારાના કાઉન્ટર પણ શરૂ કરવામાં આવ્યાં હતાં.