ગાંધીનગર : મુખ્યમંત્રી ભૂપેન્દ્રભાઈ પટેલની અધ્યક્ષતા હેઠળ આજે રાજ્ય મંત્રી મંડળની બેઠક મળી હતી. આ બેઠકમાં લેવાયેલા મહત્ત્વપૂર્ણ નિર્ણયો અને ચર્ચાયેલા વિષયો અંગે પ્રેસ-મીડિયાને માહિતી આપતાં પ્રવક્તા મંત્રી જીતુભાઈ વાઘાણીએ ખેડૂતોને અપાયેલા ઉદાર રાહત પેકેજ અને જળ વ્યવસ્થાપન ક્ષેત્રે ગુજરાતની સિદ્ધિઓ વિશે માહિતી આપી હતી.
ખેડૂતો માટે ઉદારતમ રાહત પેકેજ
રાજ્યમાં તાજેતરના કમોસમી વરસાદને કારણે ખેડૂતોને થયેલા નુકસાનમાંથી ફરી બેઠા કરવા મુખ્યમંત્રી ભૂપેન્દ્રભાઈ પટેલે સંવેદનશીલ અભિગમ અપનાવ્યો છે.
 * કુલ રાહત રકમ: અગાઉ જાહેર કરાયેલા ₹૯૪૭ કરોડ અને તાજેતરમાં જાહેર કરાયેલા ₹૧૦,૦૦૦ કરોડના પેકેજ ઉપરાંત, મુખ્યમંત્રીએ અગાઉના ₹૯૪૭ કરોડના પેકેજમાં પિયત અને બિન-પિયત માટે એક સમાન ધોરણે સહાય આપવાનો નિર્ણય કરતાં વધુ ₹૧૯૦ કરોડ ફાળવ્યા છે.
 * અંતિમ પેકેજ: આ વધારા સાથે, સમગ્ર ગુજરાતના ધરતીપુત્રોને રાજ્ય સરકાર દ્વારા આપવામાં આવેલી સહાયની કુલ રકમ હવે વધીને ₹૧૧,૧૩૭ કરોડ થઈ છે.
 * અભિનંદન: રાજ્ય મંત્રી મંડળે ગુજરાતના ખેડૂતો વતી મુખ્યમંત્રી ભૂપેન્દ્રભાઈ પટેલને આ બે ઉદારતમ કૃષિ રાહત પેકેજ બદલ અભિનંદન પાઠવીને આભાર વ્યક્ત કર્યો હતો.
જળ વ્યવસ્થાપન ક્ષેત્રે ગુજરાતની સિદ્ધિ
જીતુભાઈ વાઘાણીએ વધુમાં જણાવ્યું હતું કે, જળ વ્યવસ્થાપન ક્ષેત્રે પણ ગુજરાતે ઐતિહાસિક સિદ્ધિઓ મેળવી છે. ભારત સરકારના જળશક્તિ મંત્રાલયે જાહેર કરેલા છઠ્ઠા નેશનલ વોટર એવોર્ડ્સ માં ગુજરાતને વિવિધ શ્રેણીઓમાં સ્થાન મળ્યું છે:
 * જળ સંરક્ષણ: ગુજરાતે જળ સંરક્ષણ ક્ષેત્રે દ્વિતીય સ્થાન પ્રાપ્ત કર્યું છે.
 * સિવિલ સોસાયટી શ્રેણી: બનાસ ડેરીને પ્રથમ સ્થાન પ્રાપ્ત થયું છે.
 * ઇનસાઇડ કેમ્પસ શ્રેણી: IIT-ગાંધીનગરને પ્રથમ સ્થાન પ્રાપ્ત થયું છે.
 * અર્બન લોકલ બોડી શ્રેણી: ભાવનગર મહાનગરપાલિકાને દ્વિતીય સ્થાન પ્રાપ્ત થયું છે.
આ સિદ્ધિઓ બદલ પણ રાજ્ય મંત્રી મંડળની બેઠકે મુખ્યમંત્રી ભૂપેન્દ્રભાઈ પટેલને અભિનંદન પાઠવ્યા હતા.