સુરત: સુરત રેલ્વે પોલીસે (GRP) તાજેતરમાં એક વિશેષ ઝુંબેશ ચલાવીને ચોરી થયેલા અને ગુમ થયેલા મોબાઈલ ફોન શોધી કાઢવામાં મોટી સફળતા મેળવી છે. 5 થી 15 નવેમ્બર 2025 દરમિયાન આયોજિત આ સ્પેશ્યલ ડ્રાઈવના ભાગરૂપે, પોલીસની કુલ 5 અલગ-અલગ ટીમોએ કામગીરી કરી હતી. આ ઝુંબેશના અંતે, પોલીસે કુલ 54 મોબાઈલ ફોન રિકવર કર્યા છે, જેની બજાર કિંમત આશરે ₹9.72 લાખ જેટલી આંકવામાં આવી છે.
રેલ્વે પોલીસે માત્ર ગુમ થયેલા મોબાઈલ ફોન જ નહીં, પણ આ ચોરી અને ગુનાખોરીના મૂળ સુધી પહોંચીને કાયદેસરની કાર્યવાહી પણ કરી છે. આ ડ્રાઈવ દરમિયાન 4 આરોપીઓ – સાદિક સાબિત શેખ, જયેશ રવીન્દ્રભાઈ પવાર, સલમાન સલીમ શેખ અને તલ્હા અબ્દુલ રજાક શેખ – ને ઝડપી પાડવામાં આવ્યા છે. પોલીસના જણાવ્યા મુજબ, આ કાર્યવાહીના કારણે કુલ 7 ચોરીના ગુનાઓ પણ ડિટેક્ટ કરવામાં આવ્યા છે, જે રેલ્વે વિસ્તારમાં વધતી મોબાઈલ ચોરીની ઘટનાઓ પર અંકુશ લાવવામાં મહત્ત્વપૂર્ણ સાબિત થશે.
મોબાઈલ ફોન શોધવાની આ કાર્યવાહીમાં CEIR પોર્ટલ (Central Equipment Identity Register)ની મદદ લેવામાં આવી હતી. આ ટેક્નોલોજીના ઉપયોગથી પોલીસને ચોરી કે ગુમ થયેલા મોબાઈલ ફોનને ટ્રેક કરવામાં અને તેને રીકવર કરવામાં ખૂબ જ મદદ મળી છે. રિકવર કરાયેલા 54 ફોનમાંથી 47 ફોન તો મિસિંગ અરજીના હતા, જે વિવિધ કંપનીઓના હતા અને હવે તે તેમના મૂળ માલિકોને પરત કરવામાં આવશે.
સુરત રેલ્વે પોલીસની આ વિશેષ ઝુંબેશ માત્ર ચોરીના ફોન રિકવર કરવા પૂરતી સીમિત ન રહેતા, ગુનાખોરીના નેટવર્કને તોડી પાડવામાં પણ સફળ રહી છે. પોલીસની આ સરાહનીય કામગીરીથી રેલ્વે સ્ટેશન અને આસપાસના વિસ્તારમાં મુસાફરી કરતા નાગરિકોમાં સુરક્ષાની ભાવના વધશે અને ચોરીની ઘટનાઓમાં ઘટાડો થશે તેવી આશા છે.