અમદાવાદ મહાનગરપાલિકા (AMC)ના બેદરકાર વહીવટની વધુ એક ઘટના મકરબા રોડ પર સામે આવી છે. ટોરેન્ટ પાવર નજીક આવેલા મુખ્ય માર્ગ પર ગટરનું ઢાંકણું તૂટી જતાં રોડ પરથી પસાર થઈ રહેલા એક આધેડ વ્યક્તિ તેમાં પડી ગયા હતા. આ ઘટના સમયે રોડ પરથી પસાર થઈ રહેલા એક બહાદુર યુવકની સમયસૂચકતા અને હિંમતના કારણે આધેડનો જીવ બચી ગયો હતો. યુવકે પોતાનો જીવ જોખમમાં મૂકીને ગટરમાં ઉતરીને આધેડને બહાર કાઢ્યા હતા. આ ઘટનાએ મહાનગરપાલિકાની કામગીરી પર ગંભીર સવાલો ઊભા કર્યા છે.