ભરૂચ, ગુજરાત - ભરૂચ જિલ્લાના આમોદ ખાતે આવેલી સમા હોટલ પર એક અત્યંત કરુણ ઘટના સામે આવી છે, જેમાં ઉત્તર પ્રદેશના એક ટ્રક ચાલકનું અચાનક હાર્ટ એટેક આવવાથી મોત નીપજ્યું છે. કિસ્મઅલી સહેજાદઅલી શેખ નામનો આ ટ્રક ચાલક ટ્રક પાર્ક કરીને હોટલના કાઉન્ટર પર સોડા લેવા માટે ગયો હતો. સોડા લીધાની ગણતરીની સેકન્ડોમાં જ તેમને હાર્ટ એટેક આવ્યો અને તેઓ નીચે ઢળી પડ્યા હતા, જેના સમગ્ર CCTV ફૂટેજ પણ બહાર આવ્યા છે.
મૃતક ટ્રક ચાલક કિસ્મઅલી સહેજાદઅલી શેખ (રહે. ઉત્તર પ્રદેશ) જ્યારે પોતાની ટ્રક પાર્ક કરીને સમા હોટલના કાઉન્ટર પર સોડા લેવા ગયા, ત્યારે તેમની તબિયત એકાએક લથડી હતી. સીસીટીવી ફૂટેજમાં જોઈ શકાય છે કે સોડા લીધા બાદ તરત જ તેમને ભીષણ હૃદય રોગનો હુમલો આવ્યો હતો અને તેઓ કાઉન્ટર પરથી જ જમીન પર બેભાન થઈને ઢળી પડ્યા હતા. આ ઘટના એટલી ઝડપથી બની હતી કે ત્યાં હાજર અન્ય લોકો કે હોટલ સ્ટાફ કઈ સમજે તે પહેલા જ ગણતરીના સમયમાં યુવાનનું જીવનદીપ બુજાઈ ગયું હતું.
આ કરુણ ઘટના બનતા જ હોટલ ઉપર હાજર હોટલના માલિક ઇમરાનભાઈએ તત્કાળ માનવતા દાખવી હતી. તેમણે કોઈ પણ વિલંબ કર્યા વિના ૧૦૮ એમ્બ્યુલન્સને બોલાવી હતી અને ટ્રક ચાલક કિસ્મઅલી શેખને તાત્કાલિક આમોદ સામુહિક આરોગ્ય કેન્દ્ર ખસેડવાની વ્યવસ્થા કરી હતી. જોકે, ફરજ પરના તબીબે તેમને તપાસ્યા બાદ મૃત જાહેર કર્યા હતા. હોટલ માલિક દ્વારા કરવામાં આવેલી તત્કાળ મદદ છતાં યુવાનનો જીવ બચી શક્યો નહોતો, જે દર્શાવે છે કે હાર્ટ એટેક કેટલો ઘાતક અને અચાનક હોઈ શકે છે.
આ બનાવથી ટ્રક ડ્રાઈવર સમુદાયમાં અને રોડ પર મુસાફરી કરતા લોકોમાં ચિંતાનું મોજું ફેલાઈ ગયું છે. લાંબા અંતરની મુસાફરી અને ઓછા આરામને કારણે ટ્રક ચાલકોમાં હૃદય રોગના હુમલાનું જોખમ વધી રહ્યું હોવાનું તબીબી જગત માને છે. સોડા લેવા ગયેલા યુવાનનું હાર્ટ એટેકથી મૃત્યુ થવું એ વાતની પુષ્ટિ કરે છે કે અચાનક આવતા મૃત્યુના કિસ્સાઓ હવે માત્ર મોટી ઉંમરના લોકો પૂરતા મર્યાદિત રહ્યા નથી. કિસ્મઅલી શેખના મૃતદેહને તેમના વતન મોકલવા માટેની કાયદેસરની કાર્યવાહી આમોદ પોલીસ દ્વારા હાથ ધરવામાં આવી છે.