રાજકારણ બુધ્ધીનો વિષય : મોદીએ જે કહયું તે કરી બતાવ્યુ : ભરતસિંહ
જન્મદિવસે સોલામાં પરિવાર સંગમ સંમેલન દરમિયાન કોંગ્રેસના પીઢ નેતા ભરતસિંહ સોલંકીએ કરી પીએમની મુકત મને પ્રશંસા : આ સંમેલનમાં શંકરસિંહ વાઘેલા, સાંસદ ગેનીબેન, પરેશભાઇ ધાનાણી, જગદીશ ઠાકોર સહિતના આગેવાનો ઉપસ્થિત રહેલ
અમદાવાદ, તા.૨૭: કોંગ્રેસના પીઢ નેતા ભરતસિંહ સોલંકીના જન્મદિવસ નિમિત્તે સોલા વિસ્તારના બેબીલોન ખાતે આવેલા નિસર્ગ ફાર્મમાં ‘પરિવાર સંગમ સંમેલન' કાર્યક્રમનું આયોજન કરવામાં આવ્યું હતું. આ કાર્યક્રમમાં તેમણે અનેક મુદ્દે સ્પષ્ટ નિવેદનો આપ્યા હતા, જેમાં ભાજપના નેતળત્વની બુદ્ધિમત્તાનો આડકતરી રીતે સ્વીકાર, ‘આપ' પાર્ટી કોંગ્રેસ માટે બાધા હોવાનો દાવો, અને મતદાર યાદી (SIR)ની કામગીરી પર ચિંતા વ્યક્ત કરી હતી.
ભરતસિંહ સોલંકીએ ભારપૂર્વક જણાવ્યું કે, ‘રાજકારણમાં બુદ્ધિ અને માત્ર બુદ્ધિથી જ આગળ વધી શકાય અને તે બુદ્ધિનો વિષય છે.' તેમણે વડાપ્રધાન મોદીને ટાંકીને કહ્યું, મોદીએ માધવસિંહ સોલંકીના રાજમાં કહ્યું હતું કે, ‘હું કોંગ્રેસને ૧૫ વર્ષ સુધી ગુજરાતમાં ઉંચી નહીં આવવા દઉં અને તેમણે જે કહ્યું તે પાળીને કરી બતાવ્યું.'
આ નિવેદન દ્વારા ભરતસિંહ સોલંકીએ આડકતરી રીતે કબૂલ્યું હતું કે ભાજપની વિચારધારા, બુદ્ધિમત્તા અને નેતળત્વના કારણે જ ભાજપ આજે સત્તા પર છે. તેમણે ઉમેર્યું કે, સ્વૈચ્છિક કામ કરનાર લોકોની જરૂર છે, જેનાથી પાર્ટી ઉંચી આવી શકે.
ભરતસિંહ સોલંકીએ આમ આદમી પાર્ટીને ગુજરાતમાં કોંગ્રેસ માટે એક મોટી બાધા ગણાવી હતી. તેમણે પોતાના ભાષણમાં કહ્યું હતું કે, ‘આપ પાર્ટીની વિચારધારા શું, એનું નેતળત્વ શું, એ કેટલી ચાલવાની?ૅ, જો ‘આપ'ને સમાવીને લુપ્ત કરીએ તો કોંગ્રેસ ભાજપને હરાવી શકે છે.' તેમણે કોંગ્રેસના કાર્યકર્તાઓને અપીલ કરી હતી કે ‘આપના નેતાઓ-આગેવાનોને કોંગ્રેસના કાર્યકર્તા સગવડતા અને જતું કરીને પદ આપીને પણ કોંગ્રેસમાં જોડો.'
તેમનો દાવો છે કે પ્રજા ભાજપથી કંટાળી છે અને ‘આપ'ના મૂળભૂત માણસો જુના કોંગ્રેસી જ છે. ભાજપ વિરોધી શક્તિઓનું જોડાણ થાય તો કોંગ્રેસ ભાજપને સીધેસીધી હરાવી દેશે.
ભરતસિંહ સોલંકીએ SIR વિશે જણાવ્યું હતું કે, SIRની કામગીરીના હવે માત્ર ૮ દિવસ જ બાકી રહ્યા છે, અને અત્યાર સુધીમાં માત્ર ૬૦થી ૭૦ ટકા જ કામ થયું છે. લઘુમતી સિવાયના મોટાભાગના વિસ્તારોમાં નોંધણીઓ બરોબર પૂરી થઈ નથી. તેમણે ધ્યાન દોર્યું કે, ૅજે આદિવાસી વિસ્તારમાં લોકો બહાર કામ કરવા જાય છે, ત્યાંના લોકોને આ કામગીરીનો ખ્યાલ જ નથી. લોકો જાગળત નથી.
તેમણે ઉમેર્યું હતું કે, રજીસ્ટર્ડ થયેલા મતદારોને પણ ફરીથી આ ફોર્મ ભરવું પડે છે. બિહારની ચૂંટણીનું ઉદાહરણ આપી તેમણે કહ્યું કે, ‘બિહારમાં હારવાનું કારણ ૬૨ લાખ મતદારો રદ થયા તે છે. ગુજરાતમાં પણ મતદાર યાદીની લડાઈ આપણે સમજવાની છે.'
ઉલ્લેખનીય છે કે, ભરતસિંહ સોલંકીએ જણાવ્યું કે રાજકારણમાં હાર-જીત માટે વિચારધારા મહત્વની છે અને ‘વિચારધારાની લડાઈમાં ભાજપ આપણને આખી જિંદગી હરાવી નહીં શકે.' તેમણે કહ્યું કે, આપણી વિચારધારા ગાંધીજી, નેહરુ, સરદાર અને આંબેડકર સાહેબની છે. આ કાર્યક્રમમાં બનાસકાંઠાના સાંસદ ગેનીબેન ઠાકોર, પૂર્વ મુખ્યમંત્રી શંકરસિંહ વાઘેલા, પરેશ ધાનાણી, જગદીશ ઠાકોર સહિતના પીઢ કોંગ્રેસ આગેવાનો ઉપસ્થિત રહ્યા હતા. જન્મદિવસ નિમિત્તે બ્લડ ડોનેશન કેમ્પ અને કોંગ્રેસના દિગ્ગજોના સન્માનનો કાર્યક્રમ પણ યોજાયો હતો
(3:59 PM IST)
છેલ્લા 8 દિવસમાં સૌથી લોકપ્રિય 
