અમદાવાદ: ગુજરાતના રાજકીય અને પત્રકારત્વના વર્તુળોમાં ચર્ચા જગાવનારા એક કેસમાં, ગુજરાત સરકારે પત્રકાર મહેશ લંગાને નીચલી કોર્ટ દ્વારા આપવામાં આવેલા આગોતરા જામીન રદ કરવાની માંગણી સાથે હાઈકોર્ટમાં ધા નાખી છે. ગુજરાત હાઈકોર્ટે ગુરુવારે (27 નવેમ્બર, 2025) રાજ્યની અરજીના સંદર્ભમાં પત્રકાર મહેશ લંગાને નોટિસ ફટકારી છે. આ કેસ ગયા વર્ષે, ખુશી એડવર્ટાઇઝિંગ આઈડિયાઝ પ્રાઇવેટ લિમિટેડના માલિક દ્વારા દાખલ કરવામાં આવેલી છેતરપિંડીની FIR પર આધારિત છે, જેમાં રૂ.28.68 લાખની રકમની લેવડદેવડનો વિવાદ છે.
રાજ્ય સરકાર દ્વારા ટ્રાયલ કોર્ટના 25 નવેમ્બર, 2024 ના આદેશને પડકારવામાં આવ્યો છે, જેમાં એડિશનલ સેશન્સ જજ હેમાંગકુમાર ગિરીશકુમાર પંડ્યાએ લંગાને આગોતરા જામીન આપ્યા હતા. ટ્રાયલ કોર્ટે જામીન આપતી વખતે મહત્ત્વપૂર્ણ નોંધ લીધી હતી કે FIR માં દર્શાવ્યા મુજબ, આ વિવાદ મુખ્યત્વે પક્ષકારો વચ્ચે પૈસા ન ચૂકવવા અંગેનો છે, જેની પ્રકૃતિ મુખ્યત્વે સિવિલ છે. કોર્ટે એ પણ નોંધ્યું હતું કે કથિત છેતરપિંડી માર્ચ 2023 થી ઓક્ટોબર 2024 વચ્ચે થઈ હોવા છતાં, ફરિયાદીએ FIR દાખલ કરવામાં થયેલા વિલંબનું કોઈ સ્પષ્ટ કારણ સમજાવ્યું નહોતું.
ફરિયાદીના આરોપો મુજબ, તેમણે લંગા પર વિશ્વાસ કરીને વિવિધ હેતુઓ માટે કુલ રૂ.રૂ.28,68,250ની રકમ વ્યોમિન મીડિયા પ્રાઇવેટ લિમિટેડના ખાતામાં ટ્રાન્સફર કરી હતી. જ્યારે ફરિયાદીએ પૈસા પાછા માંગ્યા, ત્યારે લંગાએ કથિત રીતે પોતાના મીડિયા પ્રભાવનો ઉપયોગ કરીને નકારાત્મક પ્રચારની ધમકી આપી હતી. ત્યારબાદ 29 ઓક્ટોબર, 2024 ના રોજ ભારતીય દંડ સંહિતા, 2023 (BNS) ની કલમ 316(2) (વિશ્વાસનો ગુનાહિત ભંગ) અને 318 (છેતરપિંડી) હેઠળ FIR નોંધાઈ હતી.
સેશન્સ કોર્ટે પોતાના આદેશમાં સ્પષ્ટ કર્યું હતું કે, ભલે કથિત ગુનાઓમાં મહત્તમ 7 વર્ષ સુધીની સજાની જોગવાઈ હોય, પરંતુ કેસની મૂળભૂત બાબત પૈસા ન ચૂકવવાનો સિવિલ વિવાદ હોવાથી અને અન્ય તમામ દલીલોને ધ્યાનમાં લઈને લંગાને આગોતરા જામીન આપવામાં આવ્યા હતા. હવે ગુજરાત હાઈકોર્ટમાં રાજ્ય સરકારના પડકાર બાદ, આ કેસમાં પત્રકાર લંગાને તેમની કાયદેસરની લડાઈમાં નવો વળાંક આવશે.