સુરત, ગુજરાત:  સુરત શહેરના સણિયા-હેમાદ ગામમાં આવેલા ખોડલ ફાર્મ ખાતે આયોજિત એક લગ્ન પ્રસંગમાં મોટી ચોરીની ઘટના સામે આવતાં લગ્નની તમામ ખુશીઓ પર પાણી ફરી વળ્યું છે. પલસાણાના શેઠાવ ગામે રહેતા અને સાડીનો વેપાર કરતા બળવંતભાઈ કાળુભાઈ હડિયા (ઉં.વ. 44)ના દીકરા અભિષેકના લગ્ન દરમિયાન પરિવાર મહેમાનોની આગતા-સ્વાગતામાં વ્યસ્ત હતો, તે જ સમયે રૂપિયા 9.07 લાખની કિંમતનાં સોનાના દાગીના અને રોકડ ભરેલો થેલો ગાયબ થઈ ગયો હતો. આ મામલે સારોલી પોલીસ મથકે ફરિયાદ નોંધાતા, પોલીસે તપાસનો ધમધમાટ શરૂ કર્યો છે.

મળતી વિગતો મુજબ, બળવંતભાઈ હડિયા લગ્નપ્રસંગ માટે અગાઉથી ₹3.92 લાખની કિંમતનું મંગળસૂત્ર અને સોનાની વીંટીઓ ખરીદ્યા હતા. લગ્નના દિવસે, તેઓ સોનાનું મંગળસૂત્ર, બે સોનાની વીંટી, અને ₹2.90 લાખ રોકડા એક ખાખી કલરના ચામડાના થેલામાં મૂકીને ફાર્મમાં લઈ ગયા હતા. આ ઉપરાંત, ચાલુ પ્રસંગે મામેરામાં આવેલા ₹1.51 લાખ રોકડા પણ આ જ થેલામાં મૂકવામાં આવ્યા હતા. રોકડ અને ઘરેણાંથી ભરેલો આ થેલો ખુરશી પાસે મૂકવામાં આવ્યો હતો.

પરિવારના સભ્યો લગ્ન પ્રસંગમાં આવેલા મહેમાનો અને સગાં-સંબંધીઓના આવકારમાં સંપૂર્ણપણે વ્યસ્ત હતા, તે જ ગાળામાં અજાણ્યા શખ્સો આ સોનાના દાગીના અને રોકડ ભરેલો મહત્ત્વનો થેલો ખુરશી પાસેથી સેરવીને ફરાર થઈ ગયા હતા. ચોરીની જાણ થતાં જ લગ્નના માહોલમાં ગમગીની છવાઈ ગઈ હતી. પરિવારે ખોડલ ફાર્મ સહિત સમગ્ર વિસ્તારમાં શોધખોળ કરી, પરંતુ થેલો મળી આવ્યો નહોતો.

આખરે, બળવંતભાઈ હડિયાએ સારોલી પોલીસ સ્ટેશનમાં અજાણ્યા શખ્સો વિરુદ્ધ ચોરીનો ગુનો નોંધી ફરિયાદ નોંધાવી છે. પોલીસે ગુનો નોંધીને ફાર્મ અને આસપાસના વિસ્તારના સીસીટીવી ફૂટેજ એકત્રિત કરવાની કાર્યવાહી શરૂ કરી છે, જેના આધારે ચોરી કરનાર શખ્સોનું પગેરું મેળવી શકાય. લગ્ન જેવા ખુશીના માહોલમાં થયેલી આ મોટી ચોરીએ હાજર મહેમાનોની સુરક્ષા અંગે પણ ગંભીર સવાલો ઊભા કર્યા છે.