વડોદરા અને ગુજરાતના ક્રિકેટ જગત માટે આજે દુઃખદ સમાચાર સામે આવ્યા છે. વડોદરાના ખ્યાતનામ ક્રિકેટ અમ્પાયર અને ભપૂર્વ રણજી ટ્રોફી ખેલાડી રવિ દેશમુખનું 67 વર્ષની વયે નિધન થયું છે. તેમના નિધનના સમાચાર વાયુવેગે પ્રસરતા જ બરોડા ક્રિકેટ એસોસિએશન (BCA) સહિત સમગ્ર રાજ્યના રમતગમત ક્ષેત્રમાં શોકની લાગણી પ્રસરી ગઈ છે. ક્રિકેટના મેદાન પર ખેલાડી, અમ્પાયર અને વહીવટકર્તા એમ ત્રિવિધ ભૂમિકામાં તેમણે બહુમૂલ્ય યોગદાન આપ્યું હતું.

રવિ દેશમુખે યુવાનીના દિવસોથી જ ક્રિકેટને પોતાનું જીવન સમર્પિત કર્યું હતું. તેઓ રણજી ટ્રોફીમાં વડોદરાની ટીમ વતી કુશળ બેટ્સમેન અને ચુસ્ત વિકેટકીપર તરીકે રમ્યા હતા. મેદાન પર તેમની ટેકનિક અને વિકેટ પાછળની સ્ફૂર્તિના અનેક લોકો ચાહક હતા. સક્રિય ક્રિકેટમાંથી નિવૃત્તિ લીધા બાદ તેમણે અમ્પાયર તરીકે નવી ઓળખ બનાવી હતી. રણજી ટ્રોફીથી લઈને જુનિયર લેવલની અનેક મહત્વની મેચોમાં તેમણે નિષ્પક્ષ અમ્પાયરિંગ કર્યું હતું. તેમની નિયમબદ્ધતા અને શાંત નિર્ણયક્ષમતાને કારણે તેઓ ક્રિકેટ વર્તુળમાં ખૂબ સન્માન પામ્યા હતા.

રવિ દેશમુખ માત્ર મેદાન સુધી સીમિત નહોતા, પરંતુ બરોડા ક્રિકેટ એસોસિએશનમાં પણ તેઓ અત્યંત સક્રિય રહ્યા હતા. તેમણે BCA માં મેનેજર, સિલેક્ટર અને અમ્પાયરિંગ કમિટી સહિત વિવિધ સમિતિઓમાં પાયાની સેવાઓ આપી હતી. ખાસ કરીને નવી પેઢીના અમ્પાયરો તૈયાર કરવામાં અને યુવા ખેલાડીઓને પ્રોત્સાહિત કરવામાં તેમણે હંમેશા રુચિ દાખવી હતી. તેમની વિદાયથી વડોદરા ક્રિકેટના એક યુગનો અંત આવ્યો છે.