અમદાવાદ  : ગુજરાત કે જે દાયકાઓથી એક 'ડ્રાય સ્ટેટ' તરીકે ઓળખાય છે, ત્યાંના સૌથી આધુનિક બિઝનેસ હબ ગિફ્ટ સિટી (GIFT City) માં દારૂના કાયદાને લઈને એક ક્રાંતિકારી ફેરફાર કરવામાં આવ્યો છે. હવે ગિફ્ટ સિટીની મુલાકાતે આવતા પ્રવાસીઓ કે વિદેશી નાગરિકોએ દારૂ પીવા માટે કોઈ લાંબી 'પરમિટ' પ્રક્રિયામાંથી પસાર થવું પડશે નહીં. રાજ્યના ગૃહ વિભાગે એક મહત્વપૂર્ણ ગેઝેટ નોટિફિકેશન બહાર પાડીને નિયમોમાં મોટી છૂટછાટ આપી છે.
પરમિટની જરૂરિયાત રદ, હવે માત્ર ઓળખપત્ર કાફી
અત્યાર સુધી ગિફ્ટ સિટીમાં દારૂ પીવા માટે "બાહ્ય વ્યક્તિ" (જે ગુજરાતની બહારની હોય) એ કામચલાઉ પરમિટ મેળવવી પડતી હતી. પરંતુ ૨૦ ડિસેમ્બરના નવા નોટિફિકેશન મુજબ, હવે કોઈપણ વ્યક્તિ કે જે ગુજરાતની બહારની છે અથવા વિદેશી નાગરિક છે, તે ગિફ્ટ સિટીની નિયુક્ત હોટલ કે રેસ્ટોરન્ટમાં જઈને માત્ર પોતાનું માન્ય ફોટો આઈડી કાર્ડ (Photo ID) બતાવીને દારૂનું સેવન કરી શકશે.
ગ્લોબલ ઇન્વેસ્ટર્સને આકર્ષવાનો માસ્ટર પ્લાન
સરકારનો આ નિર્ણય ગિફ્ટ સિટીને લંડન કે સિંગાપોર જેવા આંતરરાષ્ટ્રીય નાણાકીય કેન્દ્રોની હરોળમાં લાવવાનો એક પ્રયાસ છે. ૨૦૨૩માં ગિફ્ટ સિટીમાં શરતો સાથે મુક્તિ અપાયા બાદ, હવે આ પ્રક્રિયાને વધુ 'યુઝર ફ્રેન્ડલી' બનાવી દેવામાં આવી છે. આનાથી ગ્લોબલ બિઝનેસ હાઉસ અને વિદેશી પ્રોફેશનલ્સ માટે ગિફ્ટ સિટીમાં કામ કરવું અને રોકાવું વધુ સુવિધાજનક બનશે.
ક્યાં મળશે આ છૂટછાટ?
યાદ રહે કે આ છૂટછાટ આખા ગુજરાત માટે નથી, પરંતુ માત્ર ગાંધીનગર સ્થિત ગિફ્ટ સિટી (સેન્ટ્રલ બિઝનેસ ડિસ્ટ્રિક્ટ) પૂરતી મર્યાદિત છે. નિર્ધારિત એરિયામાં આવેલી લાયસન્સ ધરાવતી હોટલો અને ક્લબ્સમાં જ આ સુવિધા ઉપલબ્ધ રહેશે. સ્થાનિક ગુજરાતીઓ માટે હજુ પણ જૂના નિયમો યથાવત છે, પરંતુ બહારથી આવતા મહેમાનો માટે હવે લાલ જાજમ બિછાવવામાં આવી છે.
સરકારના આ પગલાથી ગિફ્ટ સિટીના હોસ્પિટાલિટી સેક્ટર અને ટુરીઝમને મોટો વેગ મળવાની આશા છે. હવે અહીં બિઝનેસ મિટિંગ્સની સાથે સાથે સાંજની મહેફિલ પણ પરમિટ વગર જામશે.