સુરત : સુરત મહાનગરપાલિકાના ફાયર વિભાગમાં ભ્રષ્ટાચારનો મોટો મામલો સામે આવ્યો છે. શહેરના ઉધના અને લીંબાયત ઝોનના ઈન્ચાર્જ ડેપ્યુટી ચીફ ફાયર ઓફિસર ૧ લાખ રૂપિયાની લાંચ લેતા એન્ટી કરપ્શન બ્યુરો (ACB) ના હાથે ઝડપાઈ ગયા છે. હોટલની ફાયર સેફ્ટીની NOC (નો ઓબ્જેક્શન સર્ટીફિકેટ) આપવા માટે આ લાંચ માંગવામાં આવી હતી.
ઘટનાની વિગત
આ કેસના ફરિયાદી એક જાગૃત નાગરિક છે જેમણે પોતાની હોટલ માટે ફાયર સેફ્ટીની NOC મેળવવા સુરત મહાનગરપાલિકામાં અરજી કરી હતી. આ કામગીરી પૂર્ણ કરી ફાયર સર્ટીફિકેટ આપવાના બદલામાં આરોપી ઈશ્વર મગનભાઇ પટેલ (ઉ.વ. ૪૮), જેઓ ડિવિઝનલ ફાયર ઓફિસર અને ઈન્ચાર્જ ડેપ્યુટી ચીફ ફાયર ઓફિસર (વર્ગ-૩) તરીકે કાર્યરત છે, તેમણે ૧,૦૦,૦૦૦ રૂપિયાની લાંચની માંગણી કરી હતી.
એસીબીનું છટકું અને ધરપકડ
ફરિયાદી લાંચ આપવા માંગતા ન હોવાથી તેમણે એસીબીનો સંપર્ક કર્યો હતો. જેના આધારે ૨૪ ડિસેમ્બર ૨૦૨૫ના રોજ ચોકબજાર સ્થિત મુગલીસરાઈ ફાયર સ્ટેશનના પહેલા માળે આવેલી ડેપ્યુટી ચીફ ફાયર ઓફિસરની ઓફિસમાં છટકું ગોઠવવામાં આવ્યું હતું. લાંચના છટકા દરમિયાન આરોપી ઈશ્વર પટેલે ફરિયાદી સાથે હેતુલક્ષી વાતચીત કરી લાંચની રકમ સ્વીકારી હતી. રકમ સ્વીકારતાની સાથે જ એસીબીની ટીમે ત્રાટકી આરોપીને રંગેહાથ પકડી પાડી લાંચની પૂરેપૂરી રકમ રિકવર કરી હતી.
ટ્રેપિંગ ટીમ
આ સફળ ટ્રેપ નવસારી એસીબી પોલીસ સ્ટેશનના પોલીસ ઇન્સ્પેક્ટર બી.ડી. રાઠવા અને તેમની ટીમ દ્વારા કરવામાં આવી હતી. આ સમગ્ર ઓપરેશનનું સુપરવિઝન એસીબી સુરત એકમના મદદનીશ નિયામક આર.આર. ચૌધરી અને વડોદરા રેન્જના નાયબ નિયામક બળદેવ દેસાઇ (IPS) ના માર્ગદર્શન હેઠળ કરવામાં આવ્યું હતું.
હાલ એસીબી દ્વારા આરોપી વિરુદ્ધ ભ્રષ્ટાચાર નિવારણ અધિનિયમ હેઠળ ગુનો નોંધી આગળની તપાસ હાથ ધરવામાં આવી છે. આ ઘટનાથી સુરત મહાનગરપાલિકાના અન્ય વિભાગોમાં પણ ખળભળાટ મચી ગયો છે.