સુરત, તા. 25 : કહેવાય છે કે 'જાકો રાખે સાઈયાં, માર સકે ના કોય' - આ ઉક્તિ આજે સુરતના જહાંગીરાબાદ વિસ્તારમાં અક્ષરશઃ સાચી સાબિત થઈ છે. ક્રિસમસની સવારે શહેરની 'ટાઈમ ગેલેક્સી-એ' બિલ્ડિંગમાં એક એવી ઘટના બની જેણે જોનારાઓના શ્વાસ અધ્ધર કરી દીધા હતા. બિલ્ડિંગના 10મા માળે રહેતા 57 વર્ષીય નિતિનભાઈ અડીયા સવારે 8 વાગ્યાના સુમારે પોતાના ઘરની બારી પાસે સુઈ રહ્યા હતા, ત્યારે અચાનક સંતુલન બગાડતા તેઓ બારીની બહાર ફેંકાયા હતા.
10મા માળેથી નીચે પડતી વખતે ચમત્કારિક રીતે તેમનો પગ 8મા માળની બારીની લોખંડની ગ્રીલમાં ફસાઈ ગયો હતો. નિતિનભાઈ લગભગ એક કલાક સુધી માથું નીચે અને પગ ઉપર હોય તેવી રીતે હવામાં લટકતા રહ્યા હતા. આ દ્રશ્ય જોઈને આખી સોસાયટીમાં અરેરાટી વ્યાપી ગઈ હતી અને તાત્કાલિક ફાયર કંટ્રોલ રૂમને જાણ કરવામાં આવી હતી.
ફાયર વિભાગનું દિલધડક રેસ્ક્યુ ઓપરેશન
ઘટનાની જાણ થતા જ જહાંગીરપુરા, પાલનપુર અને અડાજણ ફાયર સ્ટેશનની ટીમો ઘટનાસ્થળે પહોંચી હતી. ચીફ ફાયર ઓફિસર એસ.ડી. ધોબીના નેતૃત્વમાં રેસ્ક્યુ ઓપરેશન શરૂ કરવામાં આવ્યું હતું. બિલ્ડિંગની નીચે સુરક્ષા જાળ બિછાવવામાં આવી હતી, જ્યારે ઉપરથી દમકલોએ 10મા માળેથી દોરડા અને સેફ્ટી બેલ્ટ વડે નીચે ઉતરીને નિતિનભાઈને સુરક્ષિત રીતે પકડી લીધા હતા. 8મા માળની ગ્રીલ કાપીને તેમને અંદર લેવામાં આવ્યા હતા.
હોસ્પિટલમાં સારવાર હેઠળ
આ દિલધડક ઓપરેશન બાદ નિતિનભાઈને તાત્કાલિક એમ્બ્યુલન્સ મારફતે ગુરુકૃપા હોસ્પિટલમાં ખસેડવામાં આવ્યા હતા. જોકે તેમને કેટલીક ઈજાઓ પહોંચી છે, પરંતુ તેમની હાલત સ્થિર હોવાનું જાણવા મળ્યું છે. આ ઘટનાનો વિડિયો સોશિયલ મીડિયા પર વાયરલ થયો છે, જેમાં ફાયર ફાઈટર્સની સૂઝબૂઝ અને બહાદુરીના લોકો વ્યાપક વખાણ કરી રહ્યા છે.