સુરત તા.૧૭: સુરતમાં સોૈરાષ્‍ટ્ર કડવા પાટીદાર સેવા સમાજ- સુરત દ્વારા સ્‍નેહમિલન-૨૦૨૬ અને તેજસ્‍વી તારલાઓના સન્‍માન સમારોહમાં પૂર્વ કેન્‍દ્રીય મંત્રી અને રાજકોટના સાંસદ પરસોતમભાઇ રૂપાલા ખાસ ઉપસ્‍થિત રહયા હતા અને સમાજના હિત માટે વિવિધ સુચનો કર્યા હતા.

પોતાની ધારદાર વાણી અને લોકબોલી માટે જાણીતા સાંસદ પરષોત્તમ રૂપાલાએ સુરત ખાતે એક કાર્યક્રમમાં પાટીદાર સમાજની કડવી વાસ્‍તવિકતા વર્ણવી હતી. સૌરાષ્‍ટ્ર કડવા પાટીદાર સેવા સમાજના મંચ પરથી તેમણે સમાજના શ્રેષ્ઠીઓ અને અગ્રણીઓને આકરી ટકોર કરતા જણાવ્‍યું હતું કે, હવે સમય આવી ગયો છે કે સમાજે પોતાના આંતરિક બંધારણ અને અનુશાસન પર ગંભીરતાથી વિચાર કરવો જોઈએ.

રૂપાલાએ સમાજમાં વધી રહેલા છૂટાછેડાના કિસ્‍સાઓ અને ત્‍યારબાદની પરિસ્‍થિતિ પર અત્‍યંત ગંભીર દુઃખ વ્‍યક્‍ત કર્યું હતું. તેમણે કહ્યું કે, ‘‘સમાજ માટે એ અત્‍યંત શરમજનક બાબત છે કે દીકરીના છૂટાછેડા થયા પછી તેનો બાપ પૈસા ગણવા બેસે છે.'' આ નિવેદન દ્વારા તેમણે સમાજમાં ઘર કરી ગયેલા આર્થિક લેણદેણના કુરિવાજો પર સીધો પ્રહાર કર્યો હતો અને નૈતિક મૂલ્‍યોના અધઃપતન સામે લાલબત્તી ધરી હતી.

સમાજના મોટા કાર્યક્રમોમાં થતી ગેરશિસ્‍ત અંગે પણ તેમણે મજાકિયા અંદાજમાં આકરી વાત કરી હતી. તેમણે અવલોકન કરતા કહ્યું કે, ‘‘જ્‍યારે મંચ પરથી નેતાનું ભાષણ ચાલતું હોય, ત્‍યારે પાછળથી પંડાલો ખાલી થઈ જાય છે.'' આ બાબત સૂચવે છે કે સમાજમાં સાંભળવાની અને શિસ્‍ત જાળવવાની ક્ષમતા ઘટી રહી છે. તેમણે શ્રેષ્ઠીઓને ટકોર કરી કે કાર્યક્રમો માત્ર દેખાડા માટે નહીં, પણ વૈચારિક પરિવર્તન માટે હોવા જોઈએ.

પરષોત્તમ રૂપાલાએ ભાર પૂર્વક જણાવ્‍યું હતું કે, બદલાતા સમય સાથે સમાજમાં આવતા પરિવર્તનો અને ભવિષ્‍યના પડકારોને પહોંચી વળવા માટે એક મજબૂત સામાજિક બંધારણ ઘડવું અનિવાર્ય છે. તેમણે પાટીદાર સમાજને આંતરિક અનુશાસન કેળવવા અને કુરિવાજોનો ત્‍યાગ કરવા આહ્વાન કર્યું હતું.

સંબોધનના અંતે તેમણે ઉમેર્યું કે જો સમાજ અત્‍યારે નહીં જાગે તો આવનારી પેઢીને મોટા પડકારોનો સામનો કરવો પડશે. માત્ર આર્થિક સમળદ્ધિ જ પર્યાપ્ત નથી, સામાજિક એકતા અને નૈતિક મજબૂતી પણ તેટલી જ જરૂરી છે.