અમદાવાદ: અમદાવાદના પૂર્વ વિસ્તારની જીવાદોરી સમાન ખારીકટ કેનાલ ડેવલપમેન્ટ પ્રોજેક્ટ અત્યારે રાજકીય જંગનું મેદાન બની ગયો છે. કરોડોના ખર્ચે બની રહેલા આ પ્રોજેક્ટમાં અમદાવાદ મ્યુનિસિપલ કોર્પોરેશન (AMC) અને સિંચાઈ વિભાગ વચ્ચે સંકલનનો એવો અભાવ જોવા મળ્યો છે કે ખુદ શાસક પક્ષના ધારાસભ્યએ તંત્ર સામે મોરચો ખોલવો પડ્યો છે. દસક્રોઈના ધારાસભ્ય બાબુ જમના પટેલે AMCની નબળી કામગીરી પર સવાલ ઉઠાવતા કહ્યું હતું કે, જે પ્રોજેક્ટ માત્ર બે વર્ષમાં પૂર્ણ થવો જોઈએ, તેને ચાર વર્ષ વીતવા છતાં કેમ લટકાવાય રહ્યો છે? તંત્રની આ ધીમી ગતિને કારણે કરોડોની મશીનરી કાટ ખાઈ રહી છે અને જનતાના ટેક્સના પૈસાનું આંધણ થઈ રહ્યું છે.

વિવાદ ત્યારે વકર્યો જ્યારે ખેડૂતોને રવિ પાક માટે સિંચાઈના પાણીની જરૂર પડી, પરંતુ કેનાલનું કામ અધૂરું હોવાથી તંત્ર પાણી છોડવા તૈયાર નહોતું. આ બાબતે ધારાસભ્ય પટેલે આકરું વલણ અપનાવતા જણાવ્યું કે, "ખેડૂતોના મોંમાં આવેલો કોળિયો છીનવાઈ રહ્યો હતો, જે હું જોઈ શકું તેમ નથી." કોન્ટ્રાક્ટરની આડોડાઈ અને AMCના અધિકારીઓની મિલીભગતને કારણે પ્રોજેક્ટ વિલંબમાં પડ્યો હોવાનો આક્ષેપ કરતા ધારાસભ્યએ સ્પષ્ટ કર્યું હતું કે કોન્ટ્રાક્ટરના પાપે ખેડૂતો શા માટે સહન કરે? આખરે ધારાસભ્યએ ઉચ્ચ સ્તરે રજૂઆત કરીને બળજબરીથી પાણી છોડાવ્યું હતું, જેના કારણે ચાલુ કામ અટકાવવાની નોબત આવી હતી.

AMC દ્વારા જે કામગીરી માત્ર ૧૫ દિવસમાં પતાવી દેવાનો દાવો કરાયો હતો, ત્યાં અચાનક પાણી છોડવામાં આવતા હવે કામગીરી લાંબા સમય માટે ઠપ થઈ ગઈ છે. ધારાસભ્ય બાબુ જમના પટેલે તંત્ર પર પ્રહાર કરતા કહ્યું કે, ખેડૂતોએ બે વર્ષ સુધી ધીરજ રાખી, પણ હવે ચોથા વર્ષે પણ જો પાણી ન મળે તો તે અન્યાય છે. જો AMC અને કોન્ટ્રાક્ટરે સમયસર કામ પૂરું કર્યું હોત, તો આજે કરોડોની મશીનરી બહાર કાઢવી ન પડત અને પ્રોજેક્ટના ખર્ચમાં પણ આટલો વધારો થયો ન હોત. ધારાસભ્યના આ આક્રમક તેવરથી મ્યુનિસિપલ કોર્પોરેશનના અધિકારીઓમાં ફફડાટ વ્યાપી ગયો છે.

હાલમાં કેનાલમાં પાણી છોડાતા ખેડૂતોને તો રાહત થઈ છે, પરંતુ કરોડોનો આ પ્રોજેક્ટ ફરી એકવાર અનિશ્ચિતતાના ગર્તામાં ધકેલાયો છે. આ મામલે હવે રાજકારણ પણ ગરમાયું છે, કારણ કે ભાજપના જ ધારાસભ્યએ પોતાની નિષ્ફળ કામગીરી બદલ તંત્રને જાહેરમાં આડે હાથ લીધું છે. આગામી દિવસોમાં આ વિવાદ વધુ વકરે તેવી સંભાવના છે, કારણ કે ધારાસભ્ય હવે ખેડૂતોને થયેલા નુકસાનના વળતર માટે પણ લડત આપવાના મૂડમાં છે. ખારીકટ કેનાલનો આ કિસ્સો સરકારી તંત્ર અને ચૂંટાયેલા પ્રતિનિધિઓ વચ્ચેના સંઘર્ષનું જીવંત ઉદાહરણ બની રહ્યો છે.