ગાંધીનગર, તા. 28 જાન્યુઆરી : ગુજરાત સરકારના ઉદ્યોગ અને ખાણ વિભાગ દ્વારા મહાત્મા ગાંધી સાબરમતી આશ્રમ મેમોરિયલ ટ્રસ્ટ (MGSAMT) અને તેની ગવર્નિંગ કાઉન્સિલના બંધારણમાં મહત્વના સુધારા કરતો ઠરાવ તાજેતરમાં પ્રસિદ્ધ કરવામાં આવ્યો છે. ૨૮ જાન્યુઆરી ૨૦૨૬ના રોજ જાહેર કરાયેલા આ નવા સુધારા મુજબ, ટ્રસ્ટની ગવર્નિંગ કાઉન્સિલમાં નાયબ મુખ્યમંત્રીને મહત્વની જવાબદારી સોંપવામાં આવી છે.
નાયબ મુખ્યમંત્રી હર્ષ સંઘવી હવે વાઈસ ચેરમેન:
સરકારના ઠરાવ (ક્રમાંક: PVS-102021-381-S) મુજબ, ગુજરાત રાજ્યના નાયબ મુખ્યમંત્રી હર્ષ સંઘવીને હવે ‘મહાત્મા ગાંધી સાબરમતી આશ્રમ મેમોરિયલ ટ્રસ્ટ’ની ગવર્નિંગ કાઉન્સિલમાં ‘વાઈસ ચેરમેન’ (ઉપાધ્યક્ષ) તરીકે નામાંકિત કરવામાં આવ્યા છે. અગાઉ ૦૬-૦૯-૨૦૨૧ના રોજ કરાયેલા ઠરાવમાં સુધારો કરીને આ નવી નિમણૂક કરવામાં આવી છે.
આઈ.કે. પટેલને મેમ્બર સેક્રેટરીની જવાબદારી:
આ સાથે જ, ગવર્નિંગ કાઉન્સિલમાં વધુ એક મહત્વનો ફેરફાર કરતા આઈ.કે. પટેલ, IAS (નિવૃત્ત) જેઓ હાલ ‘ઓફિસર ઓન સ્પેશિયલ ડ્યુટી’ (OSD) તરીકે કાર્યરત છે, તેઓને હવે ગવર્નિંગ કાઉન્સિલમાં ‘મેમ્બર સેક્રેટરી’ (સભ્ય સચિવ) તરીકે નિયુક્ત કરવામાં આવ્યા છે.
રાજ્યપાલના આદેશથી અમલીકરણ:
આ સમગ્ર ફેરફારો ગુજરાતના રાજ્યપાલના નામે અને તેમના આદેશથી કરવામાં આવ્યા છે, જેની સત્તાવાર જાણ સેક્શન અધિકારી વૃતાંત વસાવડા દ્વારા કરવામાં આવી છે. આ ઠરાવની નકલો રાજ્યપાલના મુખ્ય સચિવ, મુખ્યમંત્રીના સચિવ, નાયબ મુખ્યમંત્રીના પર્સનલ સેક્રેટરી અને પ્રવાસન મંત્રી સહિતના ઉચ્ચ અધિકારીઓને રવાના કરવામાં આવી છે.
વધુમાં, અમદાવાદના કલેક્ટરને સંબંધિત ટ્રસ્ટો અને મહાનુભાવોને આ ફેરફાર અંગે જાણ કરવા સૂચના અપાઈ છે. આશ્રમની ગરિમા અને તેના વિકાસ કાર્યોને વેગ આપવા માટે સરકાર દ્વારા આ વહીવટી ફેરફારો કરવામાં આવ્યા હોવાનું માનવામાં આવે છે.