શહેર: સાવલી (વડોદરા) : આણંદના બોરસદ તાલુકાના દાવોલ ગામની વતની અને માત્ર ૧૭ વર્ષની વય ધરાવતી નિશાના લગ્ન સાવલીના પોઇચા ગામના નિલેશ રાઠોડ સાથે નક્કી થયા હતા. હજુ તો સંસારના સપનાઓ જોવાની શરૂઆત જ થઈ હતી ત્યાં આ કરુણ ઘટનાએ બે પરિવારોને હચમચાવી દીધા છે. આઠ મહિના પહેલા જ્યારે નિલેશને પગમાં ફેક્ચર થયું, ત્યારે માનવતા અને ભાવિ પત્ની તરીકેની ફરજ સમજી નિશા તેની સેવા કરવા માટે સાસરીમાં આવી હતી. કોઈને કલ્પના નહોતી કે જે ઘરમાં તે સેવા કરવા આવી હતી, ત્યાંથી જ તેની અંતિમયાત્રા નીકળશે.

ઘટનાના દિવસે જ્યારે નિલેશ અને તેની માતા ખેતરમાં કામ અર્થે ગયા હતા, ત્યારે નિશા ઘરે એકલી હતી. તેઓ જ્યારે પરત ફર્યા ત્યારે ઘરના બંને દરવાજા અંદરથી બંધ મળ્યા હતા. શંકા જતાં જ્યારે બારીમાંથી જોવામાં આવ્યું તો નિશા પંખાના હૂક સાથે લટકતી હાલતમાં મળી આવી હતી. તાત્કાલિક હોસ્પિટલ ખસેડવા છતાં ડોક્ટરો તેને બચાવી શક્યા નહોતા. આ ઘટનાએ પોઇચા ગામમાં ભારે અરેરાટી ફેલાવી દીધી છે અને લોકોમાં અનેક ચર્ચાઓ જાગી છે કે આખરે એવું તે શું બન્યું કે એક સગીરાને આવું અંતિમ પગલું ભરવાની નોબત આવી?

નિશા છેલ્લા આઠ મહિનાથી સાસરીમાં જ રહેતી હોવાથી આ કિસ્સામાં કાયદાકીય પાસાઓ પણ જટિલ બન્યા છે. સગીર વયની હોવા છતાં લગ્ન પહેલા સાસરીમાં રહેવું અને ત્યાં જ આત્મહત્યા કરવી એ બાબત પોલીસ માટે તપાસનો વિષય બની છે. શું નિશા પર કોઈ પ્રકારનું માનસિક દબાણ હતું? શું સાસરી પક્ષ સાથે કોઈ અણબનાવ બન્યો હતો? કે પછી અન્ય કોઈ ગુપ્ત કારણ જવાબદાર છે? આ તમામ પ્રશ્નોના ઉત્તર મેળવવા ભાદરવા પોલીસે પરિવારજનોના નિવેદન લેવાની પ્રક્રિયા હાથ ધરી છે.

હાલમાં યુવતીના મૃતદેહને પોસ્ટમોર્ટમ માટે મોકલી આપવામાં આવ્યો છે, જેનો રિપોર્ટ આવ્યા બાદ જ મોતનું સાચું કારણ અને સમય સ્પષ્ટ થશે. પિયર પક્ષ અને સાસરી પક્ષ વચ્ચે અત્યારે ગમગીની સાથે તણાવભર્યો માહોલ છે. આ ઘટના ફરી એકવાર સમાજ સામે પ્રશ્નાર્થ ચિહ્ન મૂકે છે કે કાચા મનની કિશોરીઓ જ્યારે ગંભીર નિર્ણય લે છે, ત્યારે તેની પાછળની પીડાને ઓળખવામાં આપણે ક્યાંક થાપ તો નથી ખાઈ રહ્યા ને? પોલીસની તપાસ બાદ જ આ 'રહસ્યમય' આપઘાત પરથી પડદો ઊંચકાશે.