અમદાવાદ :ગુજરાતના પંચમહાલ અને મહીસાગર જિલ્લામાં શિયાળાની ઋતુમાં અણધાર્યા કમોસમી વરસાદે ચોમાસા જેવો માહોલ સર્જ્યો છે. છેલ્લા બે દિવસથી વાદળછાયા વાતાવરણ બાદ આજે અચાનક મોસમનો મિજાજ બદલાયો હતો અને કેટલાક વિસ્તારોમાં માવઠું વરસ્યું હતું. કમોસમી વરસાદને કારણે વાતાવરણમાં ઠંડક પ્રસરી છે, પરંતુ ખેડૂતો માટે તે ચિંતાનો વિષય બન્યો છે.

પંચમહાલ જિલ્લાના શહેરા તાલુકાના મોરવા રેણા પંથક અને તેની આસપાસના ગ્રામ્ય વિસ્તારોમાં સવારથી જ ઘનઘોર વાદળો છવાઈ ગયા હતા ત્યારબાદ વરસાદ શરૂ થયો હતો. તે જ રીતે મહીસાગર જિલ્લામાં પણ વાદળછાયા વાતાવરણ બાદ માવઠાનું સંકટ ઘેરાયું છે. સંતરામપુર નગરમાં પણ છૂટોછવાયો વરસાદ નોંધાયો છે. આ બંને જિલ્લામાં આ કમોસમી વરસાદે ખેડૂતોને મુશ્કેલીમાં મૂકી દીધા છે.

આ કમોસમી વરસાદની સૌથી વધુ અસર રવિ પાક પર થવાની ભીતિ છે. ખેડૂતોને ઘઉંના પાકને નુકસાન થવાનો ડર સતાવી રહ્યો છે, કારણ કે વરસાદના કારણે ઘઉં ક્ષતિગ્રસ્ત થઈ શકે છે. આ ઉપરાંત બાજરી, મકાઈ જેવા પાકોને પણ મોટું નુકસાન થવાની શક્યતા છે. ઘાસચારો પણ આ માવઠાથી પ્રભાવિત થશે. વધુમાં ઉનાળાની સીઝનમાં આંબા પર આવતા મોરને પણ ક્યાંકને ક્યાંક નુકસાન થવાની ચિંતા ખેડૂતોમાં પ્રવર્તી રહી છે.

ખેડૂતો હાલમાં આર્થિક સંકટનો સામનો કરી રહ્યા છે, ત્યારે આ કમોસમી વરસાદે તેમની ચિંતામાં વધારો કર્યો છે. તૈયાર પાકને નુકસાન થવાથી તેમને મોટો ફટકો પડી શકે છે. પંચમહાલ અને મહીસાગરના આ દ્રશ્યો દર્શાવે છે કે કુદરતી આફત સામે ખેડૂતો કેટલા લાચાર છે. હવામાન વિભાગ દ્વારા આવા અણધાર્યા ફેરફારો અંગે અગાઉથી માહિતી આપવી અને સરકાર દ્વારા નુકસાની માટે વળતરની વ્યવસ્થા કરવી એ સમયની માંગ છે. કમોસમી વરસાદના કારણે વાતાવરણમાં તાપમાનમાં ઘટાડો થયો છે, જે શિયાળામાં વધુ ઠંડીનો અનુભવ કરાવશે, પરંતુ ખેતી પર તેની ગંભીર અસર થશે. આ પરિસ્થિતિ આગામી દિવસોમાં ખેડૂતો અને તેમની આજીવિકા માટે એક મોટી મુશ્કેલી ઊભી કરશે.