રાજકોટ, તા. 4 ફેબ્રુઆરી : ગુજરાત રાજ્યના સ્ટેટ મોનિટરિંગ સેલ (SMC) દ્વારા સુરત શહેરમાં ડ્રગ્સના સોદાગરો વિરુદ્ધ એક મોટી કાર્યવાહી હાથ ધરવામાં આવી છે. ૩ અને ૪ ફેબ્રુઆરી ૨૦૨૬ના રોજ ડિંડોલી વિસ્તારમાં આવેલા ફલાવર ગાર્ડન પાસેના રીજન્ટ પ્લાઝામાં એસએમસીની ટીમે ઓચિંતો દરોડો પાડીને ૧ કિલોથી વધુ પ્રતિબંધિત મેફેડ્રોન (MD) ડ્રગ્સનો જથ્થો ઝડપી પાડ્યો છે. આ ઓપરેશનમાં પોલીસે રાજસ્થાન મૂળના ત્રણ શખ્સોની ધરપકડ કરી ડ્રગ્સના મસમોટા રેકેટનો પર્દાફાશ કર્યો છે.
દરોડાની વિગત અને જપ્ત મુદ્દામાલ
એસએમસીની ટીમને મળેલી ચોક્કસ બાતમીના આધારે ડિંડોલીના રીજન્ટ પ્લાઝામાં આવેલા ફ્લેટ નંબર F-304 માં દરોડો પાડવામાં આવ્યો હતો. તપાસ દરમિયાન પોલીસને ફ્લેટમાંથી ૧૦૫૩.૬૫ ગ્રામ મેફેડ્રોન ડ્રગ્સ મળી આવ્યું હતું, જેની બજાર કિંમત અંદાજે ૩૧,૬૦,૯૫૦ રૂપિયા થાય છે. ડ્રગ્સ ઉપરાંત પોલીસે ૮ લાખની કિંમતના ૨ વાહનો, ૯૫ હજારની કિંમતના ૪ મોબાઈલ ફોન અને ૬૧,૧૦૦ રૂપિયા રોકડા મળીને કુલ ૪૧,૧૭,૦૫૦ રૂપિયાનો મુદ્દામાલ જપ્ત કર્યો છે.
ધરપકડ કરાયેલા આરોપીઓ
પોલીસે સ્થળ પરથી નીચે મુજબના ત્રણ આરોપીઓની ધરપકડ કરી છે:
૧. ઓમ પ્રકાશ રુમારામ જાટ: (રહે. બોરનાડા ગામ, લૂણી, જોધપુર, રાજસ્થાન) – આ શખ્સ એમડી ડ્રગ્સનો મુખ્ય સપ્લાયર હોવાનું સામે આવ્યું છે.
૨. મહેન્દ્ર સોહનલાલ જોશી: (હાલ રહે. રીજન્ટ પ્લાઝા, ડિંડોલી, સુરત; મૂળ રહે. કલવાણા ગામ, ઉદયપુર, રાજસ્થાન).
૩. ચૈલસિંહ હાથીસિંહ પુરોહિત: (હાલ રહે. રીજન્ટ પ્લાઝા, ડિંડોલી, સુરત; મૂળ રહે. સિરાણા ગામ, જાલોર, રાજસ્થાન).
ત્રણ મુખ્ય સપ્લાયરો વોન્ટેડ
આ ડ્રગ્સ નેટવર્કમાં સામેલ અન્ય ત્રણ શખ્સોને પોલીસે વોન્ટેડ જાહેર કર્યા છે, જેમાં પર્વત પાટિયા વિસ્તારમાં રહેતા અમિત કાબા (મૂળ રહે. ભીનમાલ, રાજસ્થાન) તેમજ રાજસ્થાનના ઝાલાવાડના મુખ્ય સપ્લાયરો રાજેશ પાટીદાર અને કંવર પાલ સિંહનો સમાવેશ થાય છે. આ ત્રણેય આરોપીઓને ઝડપી પાડવા માટે પોલીસે ચક્રો ગતિમાન કર્યા છે.
એસએમસીના પીઆઈ સી.એચ. પાનારા અને પીએસઆઈ આર.જી. વસાવા સહિતની ટીમે એનડીપીએસ એક્ટ ૧૯૮૫ ની કલમ ૮(સી), ૨૨(સી) અને ૨૯ હેઠળ ગુનો નોંધી વધુ તપાસ હાથ ધરી છે. આ દરોડાથી સુરતના ડ્રગ્સ માફિયાઓમાં ભારે ફફડાટ વ્યાપી ગયો છે.