અમદાવાદ : બગદાણાના કોળી યુવાન નવનીત બાલધિયા પર થયેલા જીવલેણ હુમલાના કેસમાં મહત્વના સમાચાર સામે આવ્યા છે. આ હાઈપ્રોફાઈલ કેસમાં સંડોવાયેલા જાણીતા લોકસાહિત્યકાર માયાભાઈ આહીરના પુત્ર જયરાજ આહીર સહિત કુલ 6 આરોપીઓને મહુવા કોર્ટ દ્વારા શરતી જામીન આપવામાં આવ્યા છે. 14 દિવસના જેલવાસ બાદ જયરાજ આહીર ભાવનગર જેલમાંથી બહાર આવ્યો હતો.

જેલના દરવાજાની બહાર નીકળતી વખતે જયરાજ આહીરના હાથમાં 'શ્રીમદ્ ભગવદ્ ગીતા' જોવા મળી હતી, જે હાલ સોશિયલ મીડિયા પર ભારે ચર્ચાનું કેન્દ્ર બની છે. જેલની બહાર ઉભેલા મિત્રો અને સમર્થકો સાથે મુલાકાત વખતે તેમજ કારમાં બેસીને રવાના થતી વખતે પણ તેણે ગીતાજી હાથમાં રાખી હતી. આ દ્રશ્યોના વીડિયો અત્યારે ઈન્ટરનેટ પર ઝડપથી વાયરલ થઈ રહ્યા છે.
કોર્ટની કાર્યવાહી અને જામીનની વિગત
મહુવા કોર્ટમાં બંને પક્ષના વકીલો વચ્ચે લાંબી દલીલો ચાલી હતી. અંતે કોર્ટે ન્યાયિક પ્રક્રિયાને ધ્યાને રાખી નીચે મુજબના આરોપીઓના શરતી જામીન મંજૂર કર્યા છે:
 * જયરાજ આહીર
 * નાજુ કામળિયા
 * કાના ભીખાભાઇ કામળિયા
 * સંજય ચાવડા
 * દિનેશ ઉર્ફે દાદુ સોલંકી
 * અજય ઉર્ફે મોટો ભાલિયા
શું હતો સમગ્ર વિવાદ?
આ વિવાદની કડી બગદાણા ટ્રસ્ટના મેનેજિંગ ટ્રસ્ટીના નામ સાથે જોડાયેલી છે.
 * શરૂઆત: મુંબઈના એક કાર્યક્રમમાં માયાભાઈ આહીરે ટ્રસ્ટી તરીકે અન્ય નામનો ઉલ્લેખ કર્યો હતો.
 * વીડિયો વિવાદ: ફરિયાદી નવનીત બાલધિયાએ સુધારો કરવા કહેતા માયાભાઈએ માફીનો વીડિયો મોકલ્યો, જે નવનીતે અન્યને શેર કરતા જયરાજ ઉશ્કેરાયો હોવાનો આક્ષેપ છે.
 * હુમલો: ૨૯ ડિસેમ્બર ૨૦૨૫ના રોજ નવનીત પર જીવલેણ હુમલો થયો હતો. હુમલાખોરો હુમલા સમયે વીડિયો કોલ પર કોઈની સાથે વાત કરી રહ્યા હોવાનો પણ આક્ષેપ છે.
તપાસની સ્થિતિ
પોલીસે આ કેસમાં ટેકનિકલ તપાસ અને મોબાઈલ લોકેશનના આધારે પુરાવા એકત્ર કર્યા છે. હાલમાં તમામ આરોપીઓ શરતી જામીન પર બહાર આવ્યા છે, પરંતુ પોલીસની તપાસ હજુ ચાલુ છે. આ ઘટનાને કારણે ભાવનગર અને મહુવા પંથકમાં સામાજિક ગરમાવો જોવા મળી રહ્યો છે.