નવસારી:દક્ષિણ ગુજરાતના નવસારીમાં ગઈકાલે રાત્રે એક કંપારી છૂટી જાય તેવી ઘટના બની છે. સુશ્રુષા હોસ્પિટલ પાસે એક પરિવારમાં લગ્નનો પ્રસંગ હતો, મહેમાનો ગરબાના તાલે ઝૂમી રહ્યા હતા, ત્યારે જ મધરાત્રે એક બેફામ કાર મોતની ગતિએ ગરબાના કુંડાળામાં ઘૂસી આવી હતી. કારની ટક્કર એટલી જોરદાર હતી કે ગરબે રમતા 5 થી વધુ લોકો હવામાં ફંગોળાયા હતા અને ગંભીર રીતે ઇજાગ્રસ્ત થયા હતા.

લોહીલુહાણ દ્રશ્યો અને અફરાતફરી:
પ્રત્યક્ષદર્શીઓના જણાવ્યા અનુસાર, કાર ચાલકે સ્ટેયરિંગ પરથી કાબૂ ગુમાવતા આ કરુણ અકસ્માત સર્જાયો હતો. ક્ષણવારમાં જ લગ્નની ખુશીઓ માતમમાં ફેરવાઈ ગઈ હતી. ઇજાગ્રસ્તોને તાત્કાલિક ખાનગી હોસ્પિટલમાં સારવાર અર્થે ખસેડવામાં આવ્યા છે. ઘટનાની જાણ થતા જ વિજલપોર પોલીસનો કાફલો ઘટનાસ્થળે દોડી ગયો હતો.

પોલીસ કાર્યવાહી:
પોલીસે આ મામલે ગુનો નોંધી કાર ચાલકની શોધખોળ હાથ ધરી છે. આ ઘટનાએ ફરી એકવાર રાત્રિના સમયે બેફામ ગાડી હંકારતા ચાલકો સામે ગંભીર સવાલો ઉભા કર્યા છે. સદનસીબે હજુ સુધી કોઈ જાનહાનિના સમાચાર નથી, પરંતુ ઈજાગ્રસ્તોની હાલત ગંભીર હોવાનું જાણવા મળ્યું છે.